Shillong, Iaiong 16: Ki trai jaka na Shilliang Um bad Sohiong kiba long trai ia ki jaka ba pyniaid ia ka surok Shillong Western By-pass, kila pynpaw iaka jingpyrshah kaba jur iaka Sorkar Jylla bad Sorkar Pdeng namar ka jingpynhiar iaka dor bai jaka-kaba la thied ban pyntrei iaka bypass.
Ki trai jaka kila pyntip ba hadien bala pyndep iaka sorjamin bad ki public hearing, la ia mynjur ba ka Sorkar ka dei ban siew ym duna T.1200 klur ka bai jaka shaki 500 ngut ki trai jaka.
Haba kren shaki lad pathai khubor, uwei naki trai jaka Bah Rogen Khyllait naka thain Sohiong, ula iathuh ba ka Sorkar Pdeng kala kyntait iaka dor bala mynjur lang da baroh bad kala mynjur ban siew tang T. 600 klur ka bai jaka.
U Bah Rogen ula kynnoh ba kane ka jingsiew tang shiteng dor naka dor bala mynjur lang haka Public Hearing, ka lah ban dei kaba la ia sngewthuh jingmut hapdeng ka Sorkar Jylla bad Sorkar Pdeng.
“Ngi dawa naka Sorkar Jylla ban kan iakren biang bad ka Sorkar Pdeng ban siew beit T. 1200 klur ka bai jaka kumba la ia mynjur lang haka jingialang ba ia don lang baroh ki trai jaka” la ong u Bah Rogen.
U Bah Rogen ula ong ba kane ka jingpynhiar dor iaka bai jaka ka wanrah ia ka jingduhnong iaki trai jaka namar ka jaka naduh Sumer Ri-bhoi district haduh Sohiong ba iaid ka Shillong Western By-Pass ka long kaba sei soh bha haka rep ka riang.
