Shillong, Kyllalyngkot 22: Ka Langsning FC hadien ka jingmad ïa ka jingshah rem, hynne ka sngi, kala ioh khur ïa ka jingjop da kaba pynrem da 4-3 ïa ka Nongrim Hills SC ha ka OC Blue Shillong Premier League 2024 ha SSA Stadium, Polo.
Ka Nongrim Hills mar ïa sdang ka jingïakhun ha ka kylla step kala ialehkai bha bad ha ka minit kaba 25 kala ioh thep kol lyngba u Alem Khongwir uba la ioh ïa ka hattrick da kaba thep syndon ha ka minit kaba 82 bad 90+1 bad ka Langsning kala ioh ban pyniakhaid ha ka minit kaba 38 ïa kaba la thep ïa ka kol da u Mecheal Roy Kurbah.
Ka jingïakhun kala sdang ban itynnad shuh shuh ha ka kylla miet ha kaba ka
Langsning kala iakhun tyngeh bad ioh thep sa 3 kol lyngba u Daohipaia Rymbai ha ka 56 bad 66 minit bad u Laldanmawia ula thep ïa ka kol lyngba ka Penalty ha ka 86 minit kaba la pynthikna syndon ïa ka Langsning ban khur syndon ia ka jingjop watla u Alem Khongwir ula ialehkai bha ban thep ïa ka hattrick hynrei kam shym la lah pat ban pynrem ïa ka Langsning.
Kumban shu pynkynamw ha ka jingïakhun ha ka wat kaba nyngkong, ka Nongrim Hills kala pynrem da 4-3 ïa ka Langsning ha ka jingïalehkai kaba la long ha ka 6 tarik u Nohprah.
Ha kawei pat ka jingïakhun, hapdeng ka Rangdajied United FC bad Nangkiew Irat SC kala kut noh ha ka jingiakhaid ha kaba ym shim la don kiba la lah ban thep kol.
Ka Langsning mynta kala kamai 10 point bad ka don hi ha ka kyrdan kaba 8, ka Rangdajied kala kamai 20 point bad neh ha ka kyrdan kaba lai, ka Nangkiew Irat bad ka Nongrim Hills kila ïa kamai mar 13 point hynrei ka Nangkiew Irat kala kiew noh na ka kyrdan kaba 5 sha ka kyrdan kaba 4.
Ha ka sngi Palei, ka jingïakhun kan long hapdeng ka Laitkor SC pyrshah ïa ka Nongthymmai SC ha ka por 2:30 mynsngi. Ha ka jingïakhun ha ka wat kaba nyngkong ka Nongthymmai kala pynrem ïa ka Laitkor da 3-1 kaba la long ha ka 4 tarik u Naiwieng 2024.
