Shillong, Naiwieng 07: Ka Sawmer SC kala wan balai ha ka OC Blue Shillong Premier League 2024 watla kala ioh ban pynrem da 1-0 ia ka Langsning FC hynne ka sngi ha jingialehkai kaba la long ha SSA Stadium, First Ground, Polo.
Mar ia sdang ka jingiakhun ka Sawmer SC kala ioh ban thep ia ka kol ha ka minit kaba 4 lyngba u Orestar Sad da ka jingai ia ka bol da u Diego Khyriem ka jingiakhun ha ka kylla step kala kut tang da kane ka jingioh thep kol ka Sawmer hi.
Ha ka kylla miet, u Bisharlang Mawthoh ula ioh ia ka lad kaba biang bha ban thep ia ka kol ka baar ia ka Sawmer hynrei ka bol kaba ula shut kala leit dei beit ha dieng kol. Ka Langsning kala pynmih bujli ia u nongialehkai da kaba wanrah Melambha Shabong uba la shut ia ka bol hynrei u nongapkol ka Sawmer u Pyrshangbanbha Dkhar ula io habn iada ia ka bol ban rung shapoh kol.
U Coach ka Langsning u Bah Khlain Pyrkhat Syiemlieh ula pynmih bujli shuh shuh ia ki nongialehkai hynrei kane ka kynhun kam shym la lah ban thaw pyrthei eiei ban ioh thep kol pyrshah ia ka Sawmer.
Ka Langsning kaba la rah teng ia ka nam lahduh kala ioh khur 3 point da ka jingjop tang ia ka jingiakhun pyrshah ia ka Nongrim Hills hynrei kala mad pat ia ka jingrem ha ki 3 tylli ki jingiakhun.
Kila don 3 tylli ki kynhun kiba la ioh khur lang mar 3 point hynrei ka Langsning ka long ka kynhun kaba duna ha ka jingioh thep kol ne ka Goal Difference.
Ka Sawmer mynta kala ioh 7 point na ki 4 tylli ki jingiakhun bad kala ia ryngkat point bad ka Shillong Lajong FC kabawan nyngkong bad ka Mawlai SC kaba wan baar hynrei kine ki ar tylli ki kynhun kidei kiba heh ha ka jingioh thep kol, katba ka Sawmer kadei ka kynhun kaba la dep tam lypa da kawei ka jingiakhun.
Lashai ka sngi Thohdieng, ka Nongrim Hills SC kan iakhun pyrshah ia ka Rangdajied United FC.
