Shillong, Iaiong 22: Ka Rangdajied United FC kala ioh rung sha ka Semi Final jong ka Shillong Premier League 2023 hadien ba kala lah ban pynrem noh iaka Nangkiew Irat SC da 2-1 ha ka jingiakhun kaba la long hynne ka sngi Nyngkong ha SSA Stadium, First Ground, Polo.
Kane ka jingiakhun hapdeng kine ki ar tylli ki kynhun naduh kaba sdang hi kala long kaba itynnad ha kaba ki rangialehkai kila ialehkai bha ha ka kylla step bad hashwa ban wai ha ka minit kaba 45 u Ieitlang Syiemlieh ula thep ia ka kol na ka bynta ka Rangdajied bad ka kylla step kala kut noh da ka jingthep shi kol ka Rangdajied.
Haba la sdang ka kylla miet, ka Nangkiew Irat kam shym la duh mynsiem na ka jingshah tam shi kol ha ka Rangdajied hynrei kila iakhun dohiap bad haka minit kaba 77 u Flavius Lalruatkima ula ioh ban pyniakhaid da kaba thep iaka kol na ka bynta ka Nangkiew Irat.
Hadien kane ka jingiakhaid ka jingiakhun kala sdang biang ban itynnad bha hynrei hashwa ban kut ka por, u ka Rangdajied kala pynmih ia u Wanlamsuk Nongkhlaw ha kaba shwa ban kut artad ula ioh thep ia ka kol kaba la pynthikna syndon ia ka Rangdajied ban rah ia ka jingjop bad ban kylla long ruh ka kynhun kaba nyngkong eh ban ioh rung sha ka Semi Final jong ka SPL 2023.
Ka Rangdajied mynta kala kamai 15 point na ki 5 tylli ki jingiakhun bad kane kala pynthikna ba kala ioh rung da kaba suk sha ka Semi Final.
Ka jingiakhun ha ka sngi Baar ha ka por 3:15 mynsngi kan long hapdeng ka Mawlai SC bad ka Shillong Lajong FC.
