Shillong, Iaiong 16: Da kaba buh hakhmat ia ka jingshngain jong ki nongialehkai, ka Shillong Sports Association (SSA) hynne ka sngi Baar kala pynsangeh ia ka jingialehkai jong ka Shillong Premier League 2023 kaba dei ban long hapdeng ka Langsning FC pyrshah ia ka Ryntih SC.
Ia katei ka jingiakhun la rai ban pynsangeh noh namar ka jingbym bit bym biang ban pynlong ia ka jingialehkai namar ka jingslap jur ryngkat bad ka eriong.
Baroh artylli kitei ki kynhun kila long kiba la pynkhreh ban ia airing ha katei ka jingiakhun na ka bynta ban iaknieh ia ka kyrdan kaba saw hynrei ka jingslap kaba la neh shiteng kynta tam kala pynthud ia ka jinglong jingman jong ka madan ialehkai. Kumta hadien ba la dep ban jurip ia ka madan ialehkai kaba la ialam da ki nongkhmih ia ka jingialehkai kila shim ia ka rai bad yn ym lah ban pynlong ia katei ka jingiakob mynta ka sngi.
Ka Shillong Sports Association kan sa pynbna ia ka tarik bad ia ka porn a ka bynta ban pynlong ia katei ka jingiakhun hapdeng ka Langsning FC pyrshah ia ka Ryntih SC.
Ha ka sngi Balang, ka jingiakhun kan long hapdeng ka Mawlai SC pyrshah ia ka Nangkiew Irat SC ha ka por 3 baje mynsngi.
