Shillong, Naiwieng 09 : Ka defending champion Mawlai SC bad ka Shillong Lajong FC kila pynneh ia ka jinglong khraw (dominance) ha ka OC Blue Shillong Premier League (SPL) 2024 da ka jingjop ia ki jingiakhun ha madan 1st Ground ka SSA, Polo hynne ka sngi Saitjain.
Ka Mawlai SC kala pynliem ia ka Nangkiew Irat SC da 2-1 kol ha ka jingialehkai ba nyngkong hashuwa ba ka Shillong Lajong kan pynliem ia ka Ryntih FC da 3-0 kol ha ka jingialehkai ba janmiet.
Ka jingiakhun hapdeng ka Mawlai SC bad ka Nangkiew Irat kala sakhi ia ka jingiakhun kaba iakhaid bha bad ha ka kylla step, kine baroh arkynhun kila ioh ban thep mar shikol.
U Samla Donlad Diengdoh na Mawlai ula ioh thep ia ka kol ba nyngkong ha ka 27 minit hynrei ka Nangkiew Irat kala ioh ban pynphai lyngba u Wallamsuk Nongkhaw ha ka minit ba 43. Haba wan phai ha ka kylla miet, u samla Arkibor Makhroh ula ioh ban thep biang ia ka kol ka Mawlai ha ka minit ba 60.
U samla Iohborlang L Lyngkhoi (14), Deibormame Tongper (73) bad u Yohaan Benjamin (80) kila ioh thep mar kawei ka kol jong ka Shillong Lajong FC ban pynliem ia ka Ryntih.
Ka Mawlai SC bad ka Shillong Lajong FC kila ioh kamai mar 10 point hynrei ka Shillong Lajong kala shim ia ka kyrdan ba nyngkong da ka jingiapher ha ka jingthep bad shah thep kol, kaba mynta ka long +8 haba nujor ia ka Mawlai kaba long +5.
Ka jingiakhun ban wan jong ka SPL kan long ha ka sngi Balang. Ha ka jingiakhun ba nyngkong, ka Sawmer SC kan iakhun pyrshah ia ka Nongthymmai SC ha ka por 1 baje janmiet bad yn bud da ka Langsning FC pyrshah ia ka Ryntih ha ka por 4:30 baje janmiet.