Shillong, Iaiong 08: Ka Rangdajied United FC kala pynliem ia ka Ryntih SC da 4-0 kol hynne ka sngi bad kala ioh bat syndon ia ka kyrdan kaba nyngkong ha ka Shillong Premier League 2023.
Ha katei ka jingiakhun kaba la long ha SSA Stadium, First Ground, Polo kala long kaba iakhaid ha ka kylla step ha kaba baroh ar tylli kitei ki kynhun kim shym la don kiba la lah ban thep kol.
Dei ha ka kylla miet ba ka Rangdajied FC kala ioh thep haduh 4 kol, mar ia sdang ka kylla miet u Robert Khongjoh ula ioh thep ia ka kol ha ka minit kaba 52, u Basuk Bin aula thep ha ka minit kaba 69, ha ka minit kaba 73 la thep ia ka kol da u Stephan Pale bad hashwa ban kut ka jingialehkai u Enestar Malngiang ula thep ia ka kol ha ka 90’+3.
Kane ka jingjop ka Rangdajied kala pynlong ia ka ban don ha ka kyrdan kaba hajrong eh jong kane ka lympung iakob ialehkai football da kaba ioh kamai 9 point, hynrei ka Ryntih kala don ha ka kyrdan kaba 4 da kaba ioh kamai 4 point.
Lashai ka sngi Baar, ka Shillong Lajong FC kan iakhun pyrshah ia ka Nongthymmai SC ha ka por 3 baje mynsngi.
Lada ka Lajong ka jop ia ka jingiakhun kan ia ryngkat bad Rangdajied ha ka jingkamai mar katjuh ia ka point.
