Shillong, Kyllalyngkot 17: Ka Rangdajied United FC kala bteng biang ban ialehkai bha ha ka OC Blue Shillong Premier League 2024 bad jop da 3-0 ia ka Langsning FC ha ka jingiakhun ha SSA Stadium,First Ground, Polo, hynne ka sngi Thohdieng.
U Owanijuh Pajuh ula thep ia ka kol ha ka 19 bad 56 minit, katba u Aenam Jyrwa ula thep ia ka kol ha ka 62 minit na ka bynta ka Rangdajied bad kane ka la pynlong syndon ia ka Rangdajied ban ym mad ia kano kano ka jingrem ha ki hynniew sien jong ka jingiakhun bad kila lah ruh ban ym shah thep ha kitei ki jingialehkai baroh.
Ka RUFC kala pynkut ia ka jingialehkai ha ka wat kaba nyngkong, da kaba jop hynriew sien, iakhaid shisien bad mad ia ka jingrem arsien bad ka la ioh khur baroh 19 point.
Ka RUFC kala shah pynrem ha ka Mawlai SC kaba bat ia ka kyrdan kaba nyngkong bad ha ka Shillong Lajong FC kaba bat ia ka kyrdan ka baar ha ka tei ka lympung iakob ialehkai.
Katba ka Langsning kaba la ioh 7 point kala lait na ka jingma ban shah pynhiar kyrdan ha kaba kala jop arsien, iakhaid shisien bad rem hynriew sien ha ka wat kaba nyngkong.
Ka Langsning ka la iakhiad ha ka jingioh mar katjuh ka point bad ka Nongthymmai SC hynrei ka Langsning kala don bha ia ka kabu ban tam ia ka Nongthymmai.
Haba phai biang sha ka jingialehkai, u Owanijuh ula ioh thep ia ka kol kaba nyngkong da kaba shut da ka kjat kadiang ia ka bol kaba la leit ban rung beit sha ka kol bad ula thep pat ia ka kol ka baar ka jongu ha ka kylla miet ia kaba u nongap kol ka Langsning u Rajat Paul Lyngdoh ym shim la lah satia ban iada.
Hadien katei, u Aenam ula shut jam bha ia ka bol na jngai bad kane ka bol kala leit rung beit shapoh kol.
U Manbhalang Nongmin ula ioh ia ka kabu kaba biang hynrei u nongap kol ka Rangadjied u Kerichard L Marshillong ula rynsied mardor ban iada ia ka bol ban ym ioh rung shapoh kol hashwa ban kut ka kylla step.
Ka Langsning kala ioh katto katne tylli ki kabu hynrei ka kabu kaba biang tam kadei kaba la ioh da u Dajiedlang Wanshnong uba la shut ia ka Free-kick kaba biang bha hynrei u nongapkol u Kerichard ula ioh ban iada ia katei ka bol ban ym ioh rung shapoh kol.
U Rajat Paul ym shim la ailad satia ia u Owanijuh ban ioh thep ia ka kol kaba lai ne ka hat-trick ha kaba ula tur ban iada ia katei ka bol bad u Ronney Chel Khongrangjem ula mareh mardor ban shut noh sha jngai ia katei ka bol shwa ba kan ioh rung shapoh kol.
Ka jingiakhun ha ka Sngi Nyngkong kan long hapdeng ka Shillong Lajong pyrshah ia ka Nongthymmai ha ka por 2:30 mynsngi.
