Shillong, Feb 28: Ka Nangkiew Irat kala pynrem da 4-0 ia ka Nongrim Hills hynne ka sngi Palei ha ka jingiakhun ia ka OC Blue Shillong Premier League 2024 kaba la long ha SSA Stadium, First Ground, Polo.
Kane ka jingiakhun ha ka kylla step kala kut ha ka jingiakhaid ha kaba baroh ar tylli ki kynhun kila ialehkai bha bad kila ia husiar ruh ba kin ym shah thep kol.
Hynrei ha ka kylla miet, ka Nangkiew Irat kala ioh ban thep 4 kol ban khur ia ka jingjop, ha kaba u Gobindash Singh ula ioh thep 2 kol ha ka 46 bad 72 minit. Katba u Jefferson Pakyntein ula thep ia ka kol ha ka 79 minit bad u Wallamsuk Nongkhlaw ula thep ha ka 90’+3 minit hashwa ban pynkut noh syndon ia kane ka jingialehkai.
Watla ka Nangkiew Irat kala ioh khur ia ka 3 point hynrei kala neh hi ha ka kyrdan kaba 6 bad ka dang shah tam ha ka Laitkor SC kaba don ha ka kyrdan kaba 5 katba ka Nongrim Hills kala neh hi ha ka kyrdan kaba 8.
Ka Nangkiew Irat mar ia sdang ka kylla miet kala sdang ban ialehkai bha bad da ka jingtbit jong ki nongialehkai shakhmat kila ioh ban thep kol.
Ha ka sngi Thohdieng ka jingiakhun kan long ha ka por 3 baje mynsngi ha kaba ka Shillong Lajong FC kan iakhun pyrshah ia ka Langsning FC. Kine ki ar kynhun kila dep ban iakhun teng ha ka wat kaba nyngkong ha kaba ka Lajong kala pynrem da 4-0 ia ka Langsning.
