Shillong, Jan 29: Ka Langsning FC kala kiew sha ka kyrdan kaba hynriew hadien ba kala pynrem da 2-0 ia ka Nongthymmai SC ha ka jingiakhun ha ka OC Blue Shillong Premier League 2024 kaba la long hynne ka sngi Balang ha SSA Stadium ha First Ground, Polo.
U Rhitso Mero ula thep ia ka kol ha ka minit kaba 25 bad 71 ban pynthikna ba ka Langsning kan jop bad khur ia ka 14 point.
Ka Langsning kala ialehkai bha ha ka wat ka baar jong kane ka lympung iakob da kaba ioh khur 7 point na ki 3 tylli ki jingiakhun.
Ka Nongthymmai kaba don ha ka kyrdan kaba 9 mynta kala bteng ban rem 6 sien lynter bad kala ioh khur tang 7 point bad ka don hapdeng ka jingma ba ka lah ban shah pynhiar kyrdan noh.
Ka Nongthymmai ka la shah pynrem ha ka Langsning da 3-2 ha ka 23 tarik u Risaw ha ka jingiakhun ha ka wat kaba nyngkong.
Naduh bas dang ka jingialehkai ka Langsning kala pyrshang ban tur shakhmat ban ioh thep kol bad ha ka minit kaba 15 u Dauruhipaia Pale ula shut jam bha ia ka bol hynrei kala leit dei ia u dieng kol bad 10 minit hadien kane, ka Langsning kala ioh thep shi kol lyngba u Rhitso Mero.
Hadien shi minit u Rhitso ula ioh biang ia ka kabu ban thep kol hynrei u nongialehkai ka Nongthymmai u Mowell Chyne ula leit ban rynsied ka met ka jongu ban iada ia ka bol ba kan ym ioh rung shapoh kol.
Ka Nongthymmai kala ioh ia kawei ka kabu kaba biang tam ha shwa ban kut ka kylla step, hynrei ka bol kaba la shut da u Rudolf Shadap kala liet dei ia u dieng kol bad ha ka kylla miet ruh ka bol kaba la shut da u Andyson Lapang, kala leit dei ia u diengkol.
U Rhitso ula ioh thep ia ka kol baar ha ka minit kaba 71 kaba la pynbuh bha da u Manbhalang Nongmin.
Ka Langsning kala dei ban ioh thep kol shuh shuh hynrei u Mecheal Roy Kurbah ym shim la lah ban thep kol ha ka jingiakhun para marwei bad u nongap kol ka Nongthymmai Akash Thapa bad hadien kane u Akash ula ioh ruh ban iada ia ka bol ban rung shapoh kol kaba la shut da u Daohipaia Rymbai hashwa ban kut syndon noh ka jingialehkai.
Ka jingiakhun ha ka sngi Palei kan long hapdeng ka Rangdajied United FC pyrshah ia ka Ryntih FC ha ka por 2:30 mynsngi.
Ka Rangdajied ha ka jingiakhun ha ka wat kaba nyngkong kala pynrem da 3-0 ia ka Ryntih ha ka 30 tarik u Risaw 2024.
