Shillong, Rymphang 05: Ka Nongthymmai SC kala iakhaid da 1-1 bad ka Shillong Lajong FC ha ka jingiakhun ha ka OC Blue Shillong Premier League 2024 kaba la long hynne ka sngi Balang ha SSA Stadium, First Ground, Polo.
Ka Lajong kala ioh thep ia ka kol ba nyngkong lyngba u Rimankhraw Kharumnuid uba la ioh pynkhih ia ka jar ha ka minit kaba 69 hynrei ka Nongthymmai kala beh bad ioh thep ia ka kol ha ka 83 minit lyngba u Donboklang Majaw.
Ka Lajong mynta kala tam da 2 point ia ka Mawlai SC kaba la ioh 26 point kaba dang bat ia ka nam lahduh haduh mynta jong kane ka lympung iakob ialehkai bad ka Mawlai SC ka dang don sa kawei ka jingiakhun kaba dang sah kaban long ha ka sngi Palei pyrshah ia ka Langsning FC.
Ka Nongthymmai ka dang don hi ha ka kyrdan ban shah pynhiar kyrdan bad kala ioh tang 8 point bad ka jinglah ka jongka ban iakhaid mynta ka sngi kala ai mynsiem ia ki nongialehaki ha kaba kila lah ban pynkut noh shi syndon ia ka jingrem kaba hynriew sien lynter.
Ka SLFC kala ioh ia ki kabu kiba biang ha ka kylla step hynrei kam shym la lah ban thep kol satia bad kane ka mynsiem iakhun kala sdang ban duh noh ha ka kylla miet katba ka Nongthymmai pat kala sdang ban ialehkai bha ha ka kylla miet.
U Rimankhraw ula ioh thep ia ka kol na ka bynta ka Lajong ha ka kylla miet hynrei kane ka jingkmen jong ka Lajong kam shim la neh slem namar hashwa ban kut ka por, u nongap kol ka Lajong u Abhay Chettri uba la mih shakhmat ban kynjat ia ka bol ym shim la ioh kynjat bha bad kumta u Donboklang khlem da pynlehnohei ia ka kabu ula thep ia ka kol ban pyniakhaid syndon ia ka jingiakhun.
Ha ka sngi Palei kin don artylli ki jingiakhun, ha ka por 11 baje mynstep ka jingiakhun kan long hapdeng ka Langsning FC pyrshah ia ka Mawlai bad ha ka por 2;30 mynsngi ka jingiakhun kan long hapdeng ka Sawmer SC pyrshah ia ka Rangdajied United FC.
