Shillong, Jymmang 10: Ka Shillong Sports Association kala long kaba la pynkhreh ban pynlong ia ka phainal jong ka Shillong Premier League 2023, ha kaba ka Mawlai Sports Club kan aireng pyrshah ia ka Rangdajied United FC.
Kane ka jingiakhun kan long ha ka sngi Saitjaiñ, ka 11 tarik u Jymmang 2024, ha SSA Stadium, First Ground, Polo, ha ka por 3 baje nohphai sngi.
Shi sngi shwa jong kane ka jingialehkai ia ka phainal, la ioh ia ka lad ban iakren bad ki nongialam jong kine ki artylli ki klob katta u bah Eskial S Mon u Jt Secretary bad u Jerry A Sutnga Asst Coach ka Mawlai Sports Club bad kumjuh u Aibanjop Shadap uba long u Head Coach ka Rangdajied United FC.
Haba phai sha ka Mawlai SC hapoh ka jingialam u bah Hering Shangpliang, ka don ka khubor kaba lam pynkyndeh ia ka mynsiem ki paid nongkyrshan hadien ba u Bah Eskial bad Bah Jerry kila pynpaw ba don lai ngut ki nongialehkai kiba kham kynsai ha ka kynhun kiba don hapdeng ka jingartatien ban lah ban don ha ka First XI namar ba ki don hapdeng ka jingshitom.
Kine ki lai ngut ki kynthup ia u Remark Kharmalki u bym shim la lah ban ialehkai jan baroh shi samoi ialehkai ba mynta, u Donlad Diengdoh bad u Raikutshisha Buam.
U Bah Eskial bad u Jerry kila pynpaw ba kane kan nym da don than ka jingktah ia ka kynhun hi baroh kawei, hadien ba ki rangialehkai kila lah ban pynpaw ia ka jinglong kaba la ih bad tbit bha ha ka liang ka rukom ialehkai ka jong ki bad ka nuksa jong kane ka paw tyngkrein mynba kila iakhun pyrshah ia ka Langsning FC ha ka Semifinal.
Katba u Aibanjop Shadap ula pynpaw ba kum ka kynhun ka biang lut baroh ki nongialehkai ban iakhun ia ka phainal ha kaba ym don wat tang uwei ruh u ban ud pang ne shitom, kane hi ka long ka dak jong ka jingkyrmen ia kane kawei ka klob, kaba watla kadei ka lahduh ha ka jylla, hynrei ka thrang ban ioh rah ia ka khusnam lahduh jongka SPL.
Ban shu kyrtiang dien biang sha kane ka samoi ialehkai kaba mynta u snem, ia ka lynti iaid ka jong kine ki ar kynhun, haduh ba kut jong ka round robin ka RUFC ka la lah ba kan ioh khur 18 point na ki 7 sien iakhun katba ka Mawlai SC ka la ioh ba kan khur 16 point.
Ha ka por ba iakhun ia ka Semifinal ka RUFC kala lah ba kan pynliem da 1-0 ia ka Shillong Lajong FC, katba ka Mawlai SC ka la jop da 2-1 ia ka Langsning FC.
