Shillong, Nohprah 02: Ka Shillong Lajong FC kala ioh bat biang ia ka kyrdan kaba nyngkong ha ka OC Blue Shillong Premier League 2024 da kaba pynrem da ka 4-1 ia ka Sawmer SC ha ka jingialehkai kaba la long ha SSA Stadium, First Ground, Polo, hynne ka sngi Nyngkong.
Ka jingiakhun hapdeng kine ki ar tylli ki kynhun kala kut ha ka jingiakhiad haka kylla step ha kaba kim shym la lah ban thep kol watla kila ioh ia ki kabu kiba biang ban thep kol.
Ka Lajong kala ioh ban thep ia ka kol ha kaminit kaba 58 lyngba u Yohaan Benjamin bad kala ioh ia ka kol ka baar ha ka minit kaba 62 ha kaba ka bol kaba la shut kala dei ia u nongialehkai shadien jong ka Sawmer bad kala leit rung shapoh kol.
Hadien kane ka Lajong kala ioh thep ia ka kol kaba lai lyngba ka Penalty ha ka minit kaba 72 ia kaba la leit ban shut da u Babysunday Marngar khlem kano kano ka jingbakla bad ia ka kol kaba saw la thep ha ka 88 minit ha kaba u Mebannangkiew Thabah ula shut jam bha iaka bol bad kala leit dei ia ki nongialehkai bad rung syndon shapoh kol.
Ka Sawmer kala ioh thep tang shi kol lyngba ka Penalty ha ka minit kaba 77 ia kaba la leit ban shut da u Orestar Sad.
Ka Lajong mynta kala bat ia ka kyrdan kaba nyngkong hynrei kala iakhaid pat da kaba ioh mar 13 point ryngkat bad ka Mawlai hynrei kala don pat ka jingiapher ha ka jingioh thep kol hynrei ka Mawlai ka dang sah ban ialehkai sa kawei ka jingialehkai ha kti.
Ka Sawmer kala hiar noh sha ka kyrdan kaba 3 da kaba ioh 11 point.
Sa kawei pat ka jingiakhun hynne ka sngi ka long hapdeng ka Laitkor SC pyrshah ia ka Langsning FC hynrei kane ka jingiakhun kala kut ha ka jingiakhaid ha kaba ym shim la don kiba la lah ban thep kol.
Ki nongialehkai ka Laitkor bad Langsning kila thaw ia ki lad ki lynti ban ioh thep kol bad kila ioh ruh ia ki katto katne ki kabu ha ka kylla step bad kylla miet hynrei ki jingpyrshang baroh kila lehnohei lut naba kim shym la lah ban thep kol.
Kane ka jingiakhiad kala pynlong ia kitei baroh ar tylli ki kynhun ban ia ioh lang mar 7 point hynrei ka Nongthymmai SC ka dang sah ban ialehkai sa kawei ka jingialehkai ha kti.
Ka jingiakhun ha ka sngi Baar kan long hapdeng ka Ryntih FC pyrshah ia ka Nangkiew Irat SC ha ka por 2:30 mynsngi.
