Shillong, Rymphang 25: Ka Mawlai SC kala nang jam shakhmat bad bteng ban lam hakhmat duh ha ka OC Blue Shillong Premier League da kaba pynrem ia ka Rangdajied United FC da 1-0 ha ka jingiakhun kaba la long hynne ka sngi Baar ha SSA Stadium, First Ground, Polo.
Hashwa kane ka jingiakhun, ka Langsning FC kala pynrem ia ka Laitkor SC da 1-0 ban ioh bat biang ia ka kyrdan kaba 4.
Ka jingiakhun hapdeng ka Mawlai bad ka RUFC kala long kaba itynnad, namar ba ka Mawlai ka donkam ban bteng ban khur ia ka jingjop ban iohrah ia ka nam lahduh bad wat ka RUFC kaba don ha ka kyrdan kaba 3, ka donkam ban khur ia ka jingjop khnang ba kan ioh mynsiem ban iakhun bha ia ki ar tylli ki jingiakhun kiba dang sah ban ioh rah ia ka nam lahduh, hynrei kane ka jingangnud kala pulom noh haba ka Mawlai kala ioh ban pynrem noh ia ka RUFC, haba u Khrawkupar Jana ula thep ia ka kol ha ka 36 minit na ka bynta ka Mawlai kaba la pynthikna syndon ban tam da 5 point iaka Shillong Lajong kaba bat ia ka kyrdan ka baar.
Ka Langsning kala ioh ban bat biang ia ka kyrdan kaba 4 lyngba ka kol kaba la thep da u Melambha Shabong ha shwa ban kut noh ka jingiakhun ha ka minit kaba 90’+2, ka Langsning kala ioh 24 point katba ka Laitkor kala ioh 23 point.
Lah ban ong, ba ka jingiakhun mynta ka sngi hapdneg kitei ki kynhun ialehkai ka long kaba kongsan bha ia ki ban ioh ia ka jingjop bad la sakhi ba ka jingiakhun naduh ba sdang ka kylla step haduh ban da kut kala long kaba itynnad.
Ha ka sngi Balang kan don tang kawei ka jingiakhun hapdeng ka Sawmer SC pyrshah ia ka Ryntih FC ha ka por 3 baje mynsngi.
