Shillong, Mar 10: Ka jingiaknieh ban ioh rah ia ka nam lahduh jong ka OC Blue Shillong Premier League 2024 kan dei ha ka sngi Saitjain hapdeng ka Mawlai SC pyrshah ia ka Shillong Lajong, hadien ba ka Laitkor SC hynne ka sngi Nyngkong kala iakhaid da 2-2 bad ka Mawlai SC ha ka jingiakhun kaba la long ha SSA Stadium, First Ground, Polo.
Ka jingthrang jong ka Mawlai SC bna ioh rah ia ka nam lahduh hynne ka sngi kala shah khanglad noh ka Laitor SC ha kaba kala iakhun tyngeh ban pyniakhaid ia ka jingiakhun. Ka Mawlai kaba don 45 point lada dei ba ka jop ia ka jingiakhun kala ioh ban rah suk ia ka nam lahduh hynrei namar ba ka iakhaid kumta ha ka jingiakhun kaba khatduh bad ka Shillong Lajong kaba don ha ka kyrdan ka baar da kaba ioh 42 Point.
Kumta ka jingiakhun hapdeng ka Mawlai pyrshah ia ka Lajong kan long kaba itynnad ha kaba ka Lajong ka donkam ban khur ia ka jingjop ban ioh rah ia ka nam Lahduh ha ka sien kaba 5, katba ka Mawlai ka donkam tang ban shu iakhaid ha ka jingiakhun ban ioh rah ia ka nam lahduh laisien lynter.
Da kane ka jingiakhaid ka Laitkor kala don ha ka kyrdan kaba 5 da kaba kamai 25 point da kaba jop 7 sien, iakhiad 4 sien bad mad ia ka jingrem 7 sien ha kane ka jingiakob ialehkai football.
Mar ia sdang ka jingiakhun ka Laitkor kala ioh artylli ki kabu hynrei ka bol kaba la shut kala leit dei ia u dengkol bad mih noh shabar, u nongialehkai ka Mawlai u Damanbhalang Chyne ula ioh ia ka kabu ksiar haba u nongialehkai shadien ka Laitkor ula btuid bad haba ula shut ia ka bol la ioh ban iada noh da u nongap kol ka Laitkor u Honestar Khyriem ia ka bol ba kan ym ioh rung shapoh kol.
Ka Laitkor kala ioh thep ia ka kol ha ka minit kaba 22 ha kaba u Moonstar Nongsiej ula shut ia ka bol bad kane ka bol kala leit dei ia ka khlieh jong u nongialehkai shadien ka Mawlai u Brolington Warlarpih bad kala leit rung beit shapoh kol.
Ki nongkyrshan jongka Laitkor kila ioh ban risa bad shad kmen hynrei kane kam shym la neh slem haba u Kevin Rymbai ula ioh thep ia ka kol ha ka 27 minit na ka bynta ka Mawlai ban pyniakhiad biang ia ka jingiakhun.
Ka Laitkor kala ioh bna tam biang shi kol ia ka Mawlai, ha kaba u Sandy Kharkongor ula ioh thep ia ka kol ha ka minit kaba 35 bad hadien kane ka jingiakhun ha ka kylls tep kala kut da ka jingtam ka Laitkor shi kol ia ka Mawlai.
Haba la sdang ka jingiakhun ha ka kylla miet ka Mawlai kala iakhun tyngeh ban ioh thep kol bad kane kala seisoh ha ka 58 minit ha kaba u Banskhemlang Mawlong ula ioh thep ia ka kol na ka bynta ka Mawlai ban pyniakhiad biang ia ka jingiakhun.
Ka Laitkor kam shym la hun ba ka jingiakhun an kut da ka jingiakhiad kumta kala bteng ban ialehkai bha hynrei kam shym la ioh ia ki kabu kiba biang ban ioh thep kol, hynrei u nongap kol ka Laitkor u Honestar ula pyni ia ka jingtbit ka jongu da kaba iada arsien ia ka bol kaba la shut da u Kevin bad ula rynsied ruh ha suin ban iada ia ka bol ban rung shapoh kol kaba la shut da u Damanbhalang.
Ka jinglah ka Laitkor ban iakhiad bad ka Mawlai, kala pynsngewtynnad pat ia ka Lajong kaba donkam ban ialehkai bha ha ka jingiakhun pyrshah ia ka Mawlai ha ka sngi Saitjain bad kumta kane ka jingiakhun an long kaba itynnad bad kaba shongshit bha hapdeng kine ki artylli ki kynhun kiban iaknieh ban iohrah ia ka nam lahduh jong ka SPL.
Ha ka sngi Baar, ka Nongthymmai SC kaba don ha ka kyrdan kaba 9 kan iakhun pyrshah ia ka Rangdajied United FC kaba don ha ka kyrdan kaba 3, ha ka por 3 baje mynsngi.
