Shillong, Rymphang 20: Ka Shillong Lajong FC kala iakhaid da 1-1 ha ka jingiakhun ia ka OC Blue Shillong Premier League 2024 pyrshah ia ka Nongrim Hills SC kaba la long hynne ka sngi Palei ha SSA Stadium, First Ground, Polo.
Ha ka jingiakhun kaba la long hynne ka sngi, ka Lajong kala ioh ban pyniakhiad da ka said ha kaba kala ioh ban thep ia ka kol ha shwa ban kut noh ka jingiakhun ha ka minit kaba 90+5 lyngba ka Penalty kaba la leit ban shut da u Iohborlang Lyngkhoi.
Ka Nongrim Hills ka la ioh ban thep ia ka kol ha ka minit kaba 47 lyngba u Bankyrshan Ryndong.
Ha ka kylla step ka jingiakhun baroh ar tylli ki kynhun kila ioh ia ki katto katne ki kabu hynrei kim shym la lah ban thep kol bad ka jingiakhun kala kut noh ha ka jingiakhiad bad ym shim la don ban thep kol.
Mar ia sdang ka kylla miet u Bankyrshan Ryndong ula thep ia ka kol na ka bynta ka Nongrim Hills bad kane kala nang ai mynsiem ia ki nongialehkai ka Nongrim Hills ban ialehkai bha shuh shuh hynrei ha shwa ban wai ka Lajong kala ioh thep ia ka kol lyngba ka Penalty kaba la pyniakhaid ia kane ka jingiakhun.
Ka Lajong mynta kala kamai 33 point na ki 14 sien ki jingiakhun bad ka Mawlai kala nang skhem ha kaban bat ia ka kyrdan kaba nyngkong da kaba ioh khur 35 point na ki 13 sien ki jingiakhun.
Ka Nongrim Hills kala neh hi ha ka kyrdan kaba 8 bad kala iakhaid pat ha ka jingioh point bad ka Sawmer SC kaba mar 15 point hynrei ka Sawmer kala khlain pat ha kaba iadei bad ka jingioh thep bun kol.
Ka jingiakhun ha ka sngi Saitjain kan long hapdeng ka Ryntih FC pyrshah ia ka Laitkor SC ha ka por 11 baje mynstep bad ha ka por 3 baje mynsngi ka Sawmer kan iakhun pyrshah ia ka Mawlai.
