Shillong, Kyllalyngkot 08: Ka Mawlai SC kaba dang bat ia ka nam kum ka lahduh jong ka Shillong Premier League jong ka samoi bala dep, kala bteng ban khur ia ka jingjop da kaba pynrem ia ka Langsning FC da 1-0 kol ha ka jingiakhun ka OC Blue Shillong Premier League 2024 hynne ka sngi Balang, kaba la long ha First Ground, Polo.
U Khrawkupar Jana ula thep ia katei ka shi kol naka bynta ka Mawlai ha ka minit kaba 70 kaba la pynskhem syndon ban ioh khur ia ka 3 point.
Kane ka jingjop kala pynlong ia ka Mawlai ban kamai 19 point na ki 7 sien ki jingiakhun bad kala tam da 3 point ia ka Shillong Lajong kaba la wan ha ka kyrdan ka ba-ar. Ka Langsning kala neh ha ka kyrdan kaba phra da kaba ioh 7 point ryngkat bad ka Nongthymmai SC hynrei ka Langsning kala wan hakhamt naka jingioh ban thep bun kol.
Mar ia sdang ka jingiakhun, ka Langsning ha ka minit ka ba-ar, u Daohipaia Rymbai ula ioh ia ka kabu kaba biang bha ha kaba ula shut ia ka bol hynrei u nongapkol ka Mawlai u Lambhamiki Lamare ula ioh ban iada ia ka bol ba kan ym rung shapoh kol.
Hadien katei, u nongialehkai ka Mawlai u Baiaikara Swer ula shut na jngai ia ka bol hynrei kam shym la leit rung shapoh kol bad u Arkibor Makhroh ula ioh ia ka lad ban thep kol hynrei u nongap kol ka Langsning u Rajat Paul Lyngdoh ula rynsied bad iada ia ka bol ban ym ioh rung sha kol.
Ka Mawlai kala pynmih bujli ia arngut ki rangialehkai ha ka kylla step da kaba wanrah ia u Donlad Diengdoh bad u Dibinroy Nongspung hynrei kim shym la lah ban thep kol.
Dei haka kylla miet ba ka Mawlai kala sdang ban ialehkai bha ha kaba ki rangialehkai ka Langsning kila shem jingeh ban tehlakam ia ki nongialehkai ka Mawlai ha kaba u Baiakara ula khring shajan ia u nongap kol bad ula pashat ia katei ka bol sha u Khrawkupar ban thep da kaba suk ia ka kol ha ka minit kaba 70 ban khur syndon ia ka jingjop.
Ha ka 14 tarik u Kyllalyngkot, ka jingiakhun kan long hapdeng ka Rangdajied United FC pyrshah ia ka Sawmer SC ha ka por 11 baje mynstep bad ha ka por 2:30 mynsngi ka jingiakhun kan long hapdeng ka Shillong Lajong pyrshah ia ka Laitkor.
