Shillong, Lber 09: Ka Mawlai SC kan hap ban iakhun tyngeh ban pynrem ia ka Laitkor SC ha ka jingiakhun kaban long ha ka Sngi Nyngkong ban pynthikna ba kan iohrah 3 sien lynter ia ka nam lahduh jongka OC Blue Shillong Premier League 2024.
Kane ka jingiakhun kan sdang ha ka por 3 baje mynsngi ha SSA Stadium ha First Ground, Polo.
Ka Mawlai haduh mynta kam shim la shah pynrem ha kano kano ka kynhun ialehkai bad na ki 16 tylli ki jingiakhun kala jop haduh 14 sien bad kala iakhaid 2 sien bad kala ioh khur 44 point bad lada ka jop iaka Laitkor kan ioh khur 47 point kaban pynlong pat ia ka Shillong Lajong FC (42 point) ban iohrah ia ka nam lahduh.
Hynrei ka Mawlai kan ym lah pat ban khein sting ia ka Laitkor kaba la iakhun ha ka sien kaba nyngkong ha ka OC Blue SPL, kala lah ban pynrem da 2-0 ia ka Rangdajied United FC ha u bnai ba lah dep.
Ha ka jingiakhun ha ka sien kaba nyngkong, ka Mawlai kala ioh ban pynrem da ka said ia ka Laitkor da 1-0 bad lada ka Laitkor ka khur ia ka jingjop kan kiew na ka kyrdan kaba 6 sha ka kyrdan kaba 4 bad lada ka iakhaid kan kiew sha ka kyrdan kaba 5.
Lada ka Mawlai kam lah ban jop pyrshah ia ka Laitjor kumta ia ka nam lahduh ban rah ia ka OC Blue SPL kan shong ha ka nsgi Saitjain ha kaba kan hap ban iakhun pyrshah ia ka Shillong Lajong kaba dei syndon ka jingiakhun kaba khatduh jong kane ka samoi ialehkai.
Ka Mawlai kala iohrah ia ka nam lahduh jong ka OC Blue SPL ha u snem 2022 bad 2023 bad lada jop mynta kan iohrah 3 sien lynter ia ka nam lahduh, katba ka Lajong, kala iohrah 4 sien ia ka nam lahduh jongka SPL.
