Shillong LS Byelection | Nang jakhom ka VPP ha WJH da ka jingleit iasoh NPP ki Nongialam

Shillong, Naitung 19 : Kum ka jingnang pyrsad mynsiem shuh shuh ia ka National People’s Party (NPP) hashuwa ka eleshon shiteng samoi ka Shillong Lok Sabha, da ki spah ngut ki Nongialam bad ki nongkyrshan ka Voice of the People Party (VPP) kila leit iasoh sha ka NPP ha ka jingialang pdiang sngewbha bala pynlong ha shnong Nongjngi, West Jaintia Hills ha ka sngi Saitjain.

Ia kane ka jingialang la pynshongkun da ka jingiadonlang u National Vice President ka NPP bad Symbud Myntri Rangbah ka Jylla Bah Sniawbhalang Dhar.

Ka Nongjngi ka dei kaba mihkhmat da u MDC ka VPP sha JHADC.

U Bah Sniawbhalang ula ong ba ka rai jong ki nongtrei ka VPP ban iasoh sha ka NPP ka pyni ba ki briewka thain kila bishar ia ka jingtreikam ki seng sain pyrthei bad kwah ban iadonlang bad ka Sorkar na ka bynta ka roi ka par.

“Lyngba ka jingiatreilang, ngin sa lah ban wanrah ia ki kam pynroi kumba phi, ki nongshongshnong, phi kwah. Ka sain pyrthei kam lah ban pynhun ia baroh. Hynrei haba ngi iatreilang, ngi lah ban leh shibun kiei kiei kaba kwah u paidbah” ong u Bah Sniawbhalang.

Ula kyntu ia kine ki dkhot ba thymmai ba kin kren pynsngewthuh lem shala ki jong ki bahaiing hasem bad ki marjan marpa.

“Iathuh ia ki bahaiing hasem, “ngi ki paidbah ka Lumstong ngi la pyrkhat thymmai. Mynta ka dei ka pali jong phi ban iawanlang noh” ula ong.

Da ka jingnang jan ka jingpynlong ia ka elekshon shiteng samoi ka Shillong Parliamentary, u Bah Sniawbhalang ula buh ia ka thong kaba shai na ka bynta ka shnong, kaba don palat 6000 ngut ki nongthep vote.

“Ka thong jong ngi ha kane ka elekshon MP ban wan ka long ba lada long kumno kumno ruh, ngi dei ban ioh ym duna ia ka 4000 vote. Lada ngi ioh 4000 vote na kane ka thain, Ngan sa pyni ia ka kam na ka bynta ka shnong Nongjngi kaba baroh kin sa sah jingkynmaw” ula ong.

U DyCM ula pynpaw ruh ba u don kumba 700 ngut ki nongtrei ka party tang ha ka shnong Nongjgi bad ula leit iakynduh dalade ia ki nongshongshnong, kam pher la ki dei na kano kano ka party.

Haba kynthoh pyrshah ia ka VPP, u Bah Sniawbhalang ula ong ba ki nongthep vote kila sngewthuh ba ka jingkyrshan ba ki ai sha ka VPP ha ki elekshon bala dep ka dei kaba shah ialam bakla.

“Don kiba ong ba ngi la leh bakla namar ba ngi la ngop ha ka jingrwai jong ki bad ngi la leit ban kyrshan ia ka Prah..Nga sngewthuh- haba ki riew rangbah bad ki nongialam ki ieng ha ka nongrim, ki paidbah ki iabud ia ki” ula ong.

“Hynrei nga kmen ba hapoh shi lane arsnem, ki paidbah ka Lumstong kila sngewthuh ba ka lynti ba ki shim hashuwa- ban kyrshan ia ka VPP- ka dei ka lynti kaba bakla” bynrap u Bah Sniawbha.