Aizawl, Rymphang 09 :Hynriew ngut ki briew kaba kynthup ia u para jong u Myntri Rangbah (CM) ka Mizoram u Zoramthanga ki la shah rai pynrem ha ka iingbishar ba kyrpang ha ka 8 tarik mynta u bnai da kaba shah set phatok shi snem kynthih namar ka jingdonkti ha ka kam bamsap lyngba ka jingai jaka na ka bynta ka jingpyntrei ia ka hydroelectric power plant.
Kine ki la shah dain kuna ruh T. 20 lak marwei ban shah pynkynriah noh shapoh central jail da ka iingbishar ba kyrpang ha Aizawl, kata lyngba ka jingpyntreikam ia ka ain Prevention of Corruption Act.
Kine ki hynriew ngut kiba la shah rai pynrem ki kynthup ia u C Vanlalchhuana, uba dei u para khatduh jong u Zoramthanga, u Saiaithanga, C Rokhumi, Lalduhawma, PC Lalthazovi, bad u KLalrawna.
Katkum ka Section 420 bad 120B jong ka Indian Penal Code, kumjuh ka Section 467, 468, 471 bad 120B, kala pynlong ia kine ba kin shah rai set phatok shi snem kynthih nalor ka kuna.
Na ka liang ki nongbishar ki la ong ba kine ki la ioh pdiang ia ka pisa bamsap lyngba ka jingshim ia ki jaka ki bym shym la pyndonkam na ka bynta ka jingtei ia ka Northeast Electric Power Corporation Ltd.’s 60MW Tuirial hydroelectric project.
