Shillong, Naiwieng 11 : U Myntri Sorkar bad Nongialam ka BJP Bah A.L Hek ha ka sngi Nyngkong, ula ong ba ka Sorkar Pdeng kan sa shim rai shen la kan weng noh ne em ia u Vice Chancellor ka NEHU Prof PS Shukla hadien ka jingiakhih da kaba shah thngan da ki seng ki samla pule ka NEHU (NEHUSU).
Haba iakren bad ki nongthoh khubor, u Bah Hek u pyntip b aula dep phah ia ki jingai jingmut sha ka Sorkar Pdeng. “Ka Sorkar Pdeng kan sa shim ia ka rai halor kane ka kam ban pynkut noh ia ki kynrum kynram kham kloi kat kaba lah” ula ong.
Kat kum ka jingong jong u, ka Sorkar kan hap ban iaid lang kat kum ka jingpynsngew jong ki paidbah ka Jylla halor kane kam baroh.
Ula pynpaw ruh ba tang ka Sorkar India kaba lah ban weng ia u VC jong ki Central University kum ka NEHU. U Myntri ula pynpaw ruh ba um don jingtip satia shano ba u VC u don bad ong ba ka Sorkar kala shimkhia bha ia ka kam pahara bad ka jingshngain.
Halor ka jinglun maw ia ka Iingsah bad ka kali u VC, u Bah Hek ula ong ba ki jingiakhih ki dei ban long ha ka lynti kaba jai jai ym ban pynjulor ia ki nongkynti jong kiwei.
U Myntri ula phah ruh ia ka shithi bala aiti da ka Meghalaya Tribal Teachers’ Association (MeTTA) ka NEHU sha ka Sorkar Pdeng. Kat kum ka jingong jong u, ka Sorkar kan sa shim ia ka kaiphod ba pura halor kane ka jingjia shuwa ban shim ia ka rai halor kane ka kam.
“Nga la iakren ia ki kam ka NEHU bad ki Nongialam ba hakhlieh jong ka BJP ha Delhi” ula ong haba pynpaw ba ia kane ka kam yn sa pynbeit noh kham kloi kat kaba lah.
Ha kajuh ka por, u Bah Hek ula ong ba ka Sorkar Jylla kam shym la sngap jar satia halor kane ka kam.
