Shillong, Nailar 21 : Ka Deputy Commissioner ka East Khasi Hills, kan sa aiti shen ia ka kaiphod halor ki kynrum kynram kiba iadei bad ka Mahadev Khola sha ka Sorkar ba kan shim rai halor kane ka kam.
Ia kane la pyntip hadien ka jingialang bala pynlong ha ka sngi Balang bad ki nongialam ka Khasi Students’ Union (KSU) Laban Circle, Dorbar Shnong,ki Pulit bad ki Pandit na ka Mahadev Khola Temple.
“Ka DC kala pyntip ba kan sa aiti iaka kaiphod sha ka Sorkar Jylla, ka ban sa shim rai shen halor kane ka kam” ong u Nongialam ka KSU Reuben Najiar haba iakren bad ki nongthoh khubor hadien ka jingialang.
U samla Reuben ula ong ba ka Union kala pynpaw ba kam long pyrshah satia ia ka temple hynrei ka dawa ban kyndang ia ki briew kiba sah ha katei ka jaka.
Kat kum ki pata khyndew u snem 1923 bala ioh lyngba ka RTI, ka jaka ka dei kaba ai sngewbha da ka Sorkar Bilat tang na ka bynta ban shna ia ka temple, ym ban long trai ne ban iashong iasah.
U samla Reuben ula pyntip ruh baka KSU kala pynsngew ia ka jingsngewkhia halor ka nongrim ba ieng da ka Tnad Khlaw halor kane ka kam, haba buh jingkylli ba kumno ka Tnad ka lah ban kam ba ka jaka kam dei shuh jong ka tnad namar la dep ban ai sha ka temple ha u snem 1923 haba ka dang lum ia ki khajna bad ai jingbit da ki snem.
Ka KSU kala tynjuh ruh ia ka jingkam ki pandit ba ki don tang 64 tylli ki longiing kiba sah ha ka temple, haba iaiban ba ki kot pata kim shym la shah ban pynlong jaka sahbriew ha kane ka jaka.
“Ka Sorkar Bilat kam sshym la ai ia kane ka jaka ha ka dur jong ka jingaiwai lane ka jingai sngewbha hynrei kala shu ai tang ka jingbit ban tei ia ka mandir” ong une u Nongialam ka KSU.
Ula kdew ruh ia ka jingkyndang bar jylla da ka Seng ha u snem 2022-23 bad ong “Ngi shem ba ki don ki briew kiba na Assam bad na kiwei pat ki jaka jong ka ri, ki bym don satia ia ki kot ki sla, kila wan bad sah ha kane ka mandir”.
U samla Reuben ula ong ba ka KSU ka ieng skhem ha ka nongrim ban pynthikna ba katei ka jaka ka dei kaba la pyndon kam beit thik tang ia ka jingbit bala ai-ka temple-ym ban iashong iasah briew ne pynlong jaka iew.
“Ngi la kren shai ruh bay m dei ban tei ia ki jingtei thymmai ha kane ka jaka tad haduh ban da shim rai da ka Sorkar” ula bynrap.
