Shillong, Jymmang 09 : Ka Sorkar Jylla kala lah ban leit shaw lut ia baroh ki nongshongshnong lajong kiba don haduh 242 ngut na Manipur ha kine ki 5 sngi bala leit noh.
Kine ki Nongshongshnong ki kynthup ia ki samla pule na Central Agriculture University, RIIMS bad Manipur University nalor katto katne ki nongleit ialehkai bad ki bahaiing hasem jong kine ki samla pule.
Kat kum ka jingiathuh jong I Nongaiktien ka Sorkar bad Myntri ka Koit ka Khiah kong Ampareen Lyngdoh, ka jingleit shaw ia ki briew lajong ka dei kaba la leh mon sngewbha bad la ailad ia ki nongshongshnong kiba kwah wan phai, ba kin ai kyrteng ialade.
I pyntip ba kane ka jingleit shaw ia ki nong Meghalaya kala sdang naduh ka 5 tarik u Jymmang bad la pyndep lut hynne ka sngi ba-ar.
Ka kynhun ba khatduh jong ki nongshongshnong ka Jylla kiba wan phai na Manipur, kila wan poi hynne ka sngi ba-ar.
