Shillong Rymphang 11: Ka seng Congress kala pynpaw iaka jingskhem jingmut ba kala rai ban iakhun ia ka elekshon MLA 2023 da kaba pynieng palat 30 ngut ki samla ki bym don ia kino kino ki dak sniew hynrei kiba don iaka jingiohi jngai naka bynta ka constituency bad ka jylla hi baroh kawei.
“Ki durkhmat kiba rim kila shu pyndonkam iaka seng ban wan ha ka bor bad ban pynurlong iaka jingkhwan myntoi shimet ka jongki ha ka por ba ki don ha ka bor, hynrei kila mih noh na ka seng ban pyniasoh pat bad ka seng kaba na Bengal bad kiwei pat ki seng, tang ban pynurlong iaka jingrhah spah bad ban don ha ka bor” ong u Manish Chatrath, AICC Incharge ka Meghalaya.
Ula ong, da ki durkhmat kiba thymmai jong ki kyrtong ka seng Congress kiban iakhun ha ka sien kaba nyngkong iaka elekshon MLA ha ka jylla kum ki khynnah kiba shu dang iala ka jingim bad kine kidei ki bym bamsap bad kiba la nang la stad bha kiban iakhun naka bynta ban pynlong iaka jylla Meghalaya kum ka jylla 5 Star.
Na ka liang u President ka Meghalaya Pradesh Congress Committee (MPCC) Bah Vincent Pala, ula ong, ka jylla ka donkam ia ka jingkylla bad ka donkam ban sdang da kaba thymmai biang bad kaba lait na ki kam bamsap bad ki jyrsieh kiba bun jait bad dei tang ka Congress kaba lah ban ai iaka jubab ia kitei ki jingeh baroh kiba la ktah mationg iaka jylla baroh kawei.
Ki nongialam ka seng Congress kila pynpaw ba ka jingdon ki nongkitkam ka seng ha kylleng ki shnong ki thaw jong ka jylla kana iarap shibun ia ka seng ban wanrah biang iaka burom bala jah jong ka jylla khamtam haba ka seng ka pynleit jingmut ha ki 81,000 ngut ki samla nongthep vote kiba don ha ka jylla.
