Shillong, Nailur 19 : U President ka All India Trinamool Congress bad MLA ka Nongthymmai Bah Charles Pyngrope, ula shah thung kum u Chief Whip ka Liang Pyrshah hapoh ka Iingdorbar Thaw Ain ka Jylla.
“Bah Charles Pyngrope, u dkhot ka Meghalaya Legislative Assembly ula ioh ia ka jingithuh da u Lamphang kum u Chief Whip ka Liang Pyrshah hapoh ka IIngdorbar Thaw Ain ka ban treikam naduh ka 15 tarik Nailur, 2025” ong u Commissioner & Secretary ka Assembly Bah Andrew Simon ha ka jingpynbna bala pynmih.
Haba pdiang ia ka rai jong u Lamphang, ka AITC kala ong “Kane ka dei ka sienjam kaba khraw ha kaban nang pyni ia ka jingdon jong ngi bad pynkhlain ia ka bynta jong ngi ha Meghalaya. Da kane, ngi pynskhem ia ka jingkut jingmut jong ngi ban ai sha ki paidbah ka Jylla ia ka Liang Pyrshah kaba khlain, kaba don jingkitkhlieh bad ba ieng na ka bynta u paidbah”.
