Cachar, Rymphang 13: Kawei ka doktor hapoh ka hospital sorkar ha Cachar district ka Assam ka la ngat ha ka jingshah thombor ha ka kynhun jong kiba bun ngut ki briew hapoh Udharbond Block Primary Health Centre.Kane ka doktor kaba la tip kyrteng kum ka Dr Dixita Nath ka la kynnoh lyngba ka social media ba ka la shah thombor ha ka kynhun jong kumba 20 ngut ki briew.
Lyngba ka Twitter, kane ka doktor ka la kynnoh ba kine ki briew ki la thaw jingklumar hapoh ka hospital bad dawa ban pynioh ia ka kali ambulance.Nalor kata ka la kam ruh ba ym shym la don bor pahara hapoh kane ka hospital hadien ba kane ka jingjia ka la wan jia.
Kane ka doktor ka la thoh lyngba ka twitter da kaba ong; “Katba Nga dang don hapdeng ka kam ha Udharbond BPHC kumba 20 ngut ki briew ki la ialum hajan jong nga bad pynmih ia ki kyntien kynthoh pyrshah bad thaw jingklumar namar ka jingbym don ambulance.Ka kali 108 ka la don lypa ha ka lynti.Ym shym la don bor pahara ha kaba kum kane ka por.Sngewbha iarap ban khanglad ia ki kam thombor pyrshah ia ki doktor.”
Ha kawei pat ka bynta, na ka liang u DGP ka Assam u GP Singh haba phai halor kane ka jingjia u la hukum ban pynshitom pyrshah ia kito ki briew kiba donkti.
Kham hashwa, kata ha ka 5 tarik u bnai Kyllalyngkot ba la dep, u doktor Bablu Das,uba trei hapoh Barpeta Civil Hospital ha Kolgachia u la ngat ha ka jingshah thombor ha ki katto katne ngut ki briew.Ki laingut ki briew kiba donkti ha kane ka kam thombor kila shah kem noh ha ki bor pulit ka Kolgachia.
Katkum ki khubor la ong ba kane ka jingjia ka la jia hapoh Barpeta Civil Hospital ha Kolgachia hadien ba uwei u doktor ia uba la tip kyrteng kum u Babul Das u la ngat ha ka jingshah thombor ha kiba haiing hasem jong ki nongpang.
