Tura, Lber 10: Bun tylli ki dukan kila shah wiang ding bad pluh ha ka thain Chibinang, West Garo Hills ha ka miet sngi Nyngkong hapdeng ka jingiakynad kaba mih na ka jingshah khang ki bar Jylla ban thep kyrteng kum ki kyrtong sha ka elekshon Garo Hills Autonomous District Council (GHADC).
Kat kum ka khubor, ki runar kila leit wiang ding ia bun ki dukan da kaba jied kyrpang ha ka thain, kaba la wanrah ia ka jingjulorbad jingduhnong kaba jur bha.
Ki Pulit kila hap ban siat pynma sha suin ban pyntieng ia u paidbhur uba la ialum paidbah ha ka thain khnang ban tehlakam ia ka shongsuk shongsain.
Ka khubor ka bym pat pynthikna ka iathuh ba kila don ruh katto katne ngut ki briew kiba la mynsaw ha kane ka jingjia.
Nalor kane, kawei ka kali Pulit ruh kala shah wiang ding ha ki runar ha kane ka jingiakynad.
Ki magistrate bad ki Pulit kila don mynta ha ka thain bad mih ki jingkulmar ban peitthuh ia ka jinglong jingman. Ka Sorkar kala pynkhlain bha ruh ia ki bor pahara ba kynthup ia ki Pulit bad ki Central Reserve Police Force (CRPF).
Ka khubor ka iathuh ruh ba bun ki samla kila sdang ban ialum ha ka thain haba pynpaw ba kila mih ban iada ia la ki jaidbynriew-ki paid Garo.
Ha kajuh ka por, ki bor district kila pynjari ia ka kyndon 163 BNSS ban tehlakam ia ka suk ka sain.
Ka hukum ka khang ban pynthut ia ka iaid ka ieng ki kali, ka jingrah ia ki dieng, ki maw, ki tiar siat lane kino kino ki tiar pynmynsaw, pynthut ia ka jingplie dukan bad ka jingialum briew ba san ngut ne pala kaba lah ban pynthut ia u paidbah.
Ha kajuh ka por, ka Sorkar kala hukum ban khang ia ka kor internet ba 48 kynta ha West Garo Hills naduh ka miet 10 tarik Lber.
.){kind=link}