Shillong, Nailar 06 : Dang 5 bnai tam ka Sorkar Meghalaya ka dang plie ia u mot dur u Tirot Sing Syiem ha Dhaka hynrei hynne ha kine ki khyndiat sngi, une u motdur ula shah pynpra hi phom ha ki paid Bangladesh, kiba iakhih pyrshah ia ka Sorkar hapoh ka Ri.
Une u mot dur jong u Tirot Sing u dei uba la pynieng hapoh ka Indira Gandhi Cultural Centre (IGCC) ha Dhaka bad la plie paidbah ia u da u High Commissioner ka India sha Dhaka, ha ka 16 tarik u Rymphang 2024.
Kat kum ka video jong ka lad pathai khubor News9, la pyni ba ka Indira Gandhi Cultural Centre, kala shah hiar thma ha ki paid nongiakhih ha kine ki khyndiat sngi.
La iohi ba ki nongiakhih kila thang dusmon ia kane ka Jingtei jong ka Sorkar India ha Dhaka bad la pyni ruh ba u mot jong u Tirot Sing ula shah pynpra phom bad sah satang u mawthoh kyrteng.
Ka 16 tarik Rymphang ka long ka sngi sah jingkynmaw ha ka histori jong ka Jaidbynriew Khasi ba ka nam jong u Khla Wait Tirot Sing Syiem, uba ka Jaidbynriew ka niewkor bad niew burom kum u Nongiakhun Laitluid pyrshah ia ka Sorkar Bilat, ula ioh jaka bad ka jingithuh wat hapoh ka Ri Bangladesh, ka jaka kaba u pynsad mynsiem khatduh eh ha kane ka sla pyrthei.
Ia une u motdur sahnam jong u Tirot Sing Syiem la plie paidbah da u High Commissioner ka Ri India sha Bangladesh u Pranay Verma bad u Symbud Myntri Rangbah ka Jylla Bah Sniawbhalang Dhar ha ka jingiadon ryngkat u Myntri ka Tnad Arts & Culture Bah Paul Lyngdoh, Myntri ka Koit ka Khiah Kong Ampareen Lyngdoh bad kiwei kiwei ki kynrem ki lyndan.
Ha kane ka sngi, la plie paidbah ruh ia ki khana da ki jingthoh dur ba batai ia ka jingim jong u Tirot Sing Syiem, kiba la wah ha ki kynroh jong ka Indira Gandhi Cultural Centre (IGCC). Nalor kane, ia ka Indian Council Cultural Centre Library ruh la ai kyrteng noh sha ka U Tirot Sing Library ban pynsahnam ia une u Khla Wait.
Ka Tnad Arts & Culture kala pynlut haduh T. 11 lak ban leh ia kane ka kam bakhraw ban pynsahnam ia u Tirot Sing.
