Shillong, Iaiong 18: Kawei ka Longkmie Khasi kala mynsaw na ka jingshah shoh ha ka trai iing jong ka Iing kaba la shong trei bylla, kaba don ha Nagpur.
Ka video jong kane ka jingjia kala saphriang ha ki rynsan social media, kaba la pyni ba kane ka longkmie kaba dei na kawei ka shnong khappud, kala iam sngewsih bad pyni ia ka jingmih snam ba jingsep ka kti ka diang na ka jingshah shoh.
U General Secretary ka Khasi Students Union (KSU) samla Donald Thabah ula pyntip ba halor kane ka jingshah thombor kane ka longkmie Khasi, ka KSU Delhi Unit kala shimkhia ban iakren ia kane ka kam bad u SP ka EKH ryngkat bad ia u Robin Hibu IPS, Special Police Unit for NE Region (SPUNER).
Ula pyntip ruh ba kane ka longkmie kala don mynta bad ki Pulit ka Nagpur bad la ialam ia ka ban pyndep ia ka Medical Check Up.
