Shillong, Risaw 28 : Bun ngut ki briew kynthup ki Nongthoh Khubor, kila shah shoh ha ka rally ba jai jai ban pyrshah ia ka jingbym lah jong ka sorkar ban leh eiei halor ka jingbym ioh kam ioh jam jong ki samla hapoh ka Jylla.
Ia kane ka rally la pynlong da ka Federation of Khasi Jaintia & Garo People (FKJGP) bad la kyrshan da kiba bun ki seng. Da ki hajar ngut ki dkhot kiba rah lang ia ki banner bad ki lama kila iashimbynta ha kane ka rally kaba sdang na Motphran bad pynkut ha Madan Iewrynghep, Fire Brigade.
Hynrei, ia kane ka jingshoh briew jong kine ki nongiaid rally la ioh ban ring dur kaba pyni ia ka jingjrong kti ia ki briew kiba iaid ba ieng bad kiba niah ia ki kali arshaka. Saw tylli ki kali kila shah pynjulor.
Arngut ki Nongthoh Khubor kila shah thombor lang ha kane ka jingiaid paidbah.
“Kila don ki jingthombor ia ki briew bad ki kali arshaka khamta ha ki thain Dhankheti ha kane ka rally. Katto katne ngut ki briew kiba thombor la lah ban pynithuh lyngba ki video bala ioh ring. Hynrei, ym shym la don pat kiba mynsaw jur” ong u Superintendent of Police (City) Bah Vivek Syiem.
U Bah Vivek u pyntip ba ka Tnad Pulit kan sa register case halor kane ka jingjia haba pyntip “Ngin sa pynlong ia ka jingtohkit bad ngin sa leh ia kaba donkam”.
Ha kajuh ka por, u President ka FKJGP Bah Dundee C Khongsit ula pan map halor kane ka jingthombor ia ki briew ba iaid lynti.
“Kum u President ka seng, nga pan map hakhmat jong baroh ki lad pathai khubor. Ngim poi pyrkhat ba kum kane ka jingjia kan jia naba shuwa ban sdang ka rally, ngi la dep kyrpad ia baroh ki samla kiba wan iashimbynta ba kane ka dei ka rally ba jai jai. Nga kwah ban pan map ia ki (briew ba shah shoh), ngi da sngewsih ia kaei kaba jia bad ngin shim ia ka jingbah khlieh” ong u Bah Dundee.
Haba pynpaw ba ka don ka jinglynga ba palat hapdeng ki samla naba ki don katto katne kiba la long langknia ha ka thep kam Pulit ka bym shym la pynbna result haduh mynta, une u Nongialam ula ong “Hynrei ka dei ka kamram jong ngi ki Nongialam ban kyrpad ia baroh ki samla ban long jai jai bad nga kyrmen ban gin lah ban pynbeit noh kham kloi ia kane kaei kaei baroh”.
