Nongpoh, Jylliew 15: Artylli ki thuk thuk kila shah rong tuh ha ka kynhun ki runar na Mawlai Nongkwar hynnin ka miet shiteng synnia hynrei ia kawei na kine ki thuk thuk la lap noh na ka thain Warmawsaw, Ri-Bhoi District da ka jingiehnoh shadien da kine ki runar.
Kine ki thuk thuk kiba shah tuh ki kynthup ia kawei ka R15 kaba don u nombor ML10-C-4295 kaba dei trai da u Pynkhraw Kharshanlor na ka shnong Saiden bad kawei pat ka dei ka Pulsar 200 ba don u nombor ML05-M-1313 ba long trai da u Iaineh Lymba na Umsawnongbri.
Kat kum ka jingiathuh ki Pulit, kine ki trai jong ki thuk thuk kila leit ban ujor ejahar ha Mawlai Police Station bad kila pyr shang wad jingtip ruh na ki paralok parajor haba pynsaphriang ruh ia kane ka jingjia ha ki rynsan social media bala thep lang ia ki dur jong kine ki thuk thuk.
Kane ka jingpyrshang kala sei soh da ka jingioh khubor ba don kiba iohi ia ka thuk thuk R15 ha surok NH-6 Ri-Bhoi kaba iaid ryngkat bad kawei ka kali Zenon kaba tap tarpal, kiba la rung ruh sha ka surok Lailad ban mih sha Patharkhmah.
Halor kane ka jingioh khubor, ki Pulit mar mar kila pyntip sha ki Pulit ka Patharkhmah bad buddien ia kine ki thuk thuk bad hadien kila lap ia ka thuk thuk R15 bala ieh ha kawei ka jaka jong ka shnong Nongdom kaba don ha thain Warmawsaw.
Ki Pulit kila register case halor kane ka jingjia bad ka jingtohkit kaba iaid shakhmat ban lapdien sa ia ka Pulsar200 kaba dang jah lem bad ia kine ki nongtuh.
