Barpeta, K’lyngkot 28: Ki pulit ka Assam ha ka 27 tarik mynta u bnai ki la kem noh ia sawngut ki briew halor ka jingdonkti ha ka kam pyniathoh shongkurim khynnah (child marriage) ha Barpeta district ka Assam.
Saw ngut ki briew kaba kynthup ia u nongiathoh bad u nongialam niam (Iman) ki la shah kem noh halor ka jingshah kynnoh donkti ha kane ka kam pyniathoh shongkurim ha Barpeta district ka Assam.Kane ka jingjia ka la jia ha ki bynta jong ka Kurbaha jong ka district.
Katkum ka khubor pulit la ong ba u Sanuar Hussain 29 snem rta uba dei na Gubardhana kaba hajan Barpeta u la pynkhreh ban pyndep ia ka jingiathoh shongkurim bad kawei ka khynnah kaba dang 16 snem rta.
“Une u nongiathoh ha ryngkat u Imam nalor kiwei pat ki la wan poi hapoh ka shnong Kurbaha na ka bynta ban pyndep ia kane ka jingiathoh shongkurim bad katei ka khynnah ha kane ka sngi Palei ba la lah,” ong ka khubor heh pulit.
“Hadien ba ngi la ioh jingtip, ka kynhun jong ngi ka la wan poi ha katei ka jaka bad ioh ban pyllait noh ia katei ka khynnah.Ngi la kem ruh ia sawngut ki briew kaba kynthup ia u nongiathoh, u kpa jong u bad u Imam halor ka jingpynkhreh ban pyndep ia kane ka jingiathoh shongkurim khynnah.Ngi la aiti noh ia kane ka khynnah sha ka Sakhi-One Stop Centre Scheme,” ong u heh pulit.
Ha kawei pat ka liang, katkum ka jingsorbe da ka National Family Health Survey-5 (NFHS-5) hapoh Assam, ki don haduh kumba 11.7 percent ki kynthei /khynnah kynthei kiba armet bad ioh khun kaba pynpaw ruh halor ka jingjur ki kam pyniathoh shongkurim khynnah ha ki bynta bapher bapher ka Assam.
Ha ka jingwad bniah la shem ruh ba hapoh Dhubri district haduh kumba 22 percent na ki longkmie/ khynnah kynthei kiba ioh khunlung ha ka rta kaba ddang khynnah.
Haba aijingkren sha ki lad pathai khubor, na ka liang u Myntri Rangbah (CM) ka Assam u Himanta Biswa Sarma u la ong ka daw jong ka jingiap hapdeng kiba bun ki khunlung bad ki longkmie lah ban ong ba ka dei namar ka jingiathoh shongkurim khynnah.
“Ka kynhun myntri ka la shim ia ka rai ba kino kino ki khynnah kynthei kiba shah pyniathoh shongkurim hapoh ka rta 14 snem, yn rejistar case hapoh ki kyndon jong ka POSCO act,” ong u CM ka Assam.
Nalor kata kano kano ka kam pyniathoh ia ki khynnah kynthei kiba dang ha ka rta 14 haduh 18 snem kin ngat ha ka jingshah pynshitom hapoh ki kyndon ain Sections 15-16 bad ngat shong phatok 2 snem shaneng, kata katkum ka jingkhia jong ka case.
