Nongpoh, Jylliew 08: Ka jingngeit ba dang don kita ki nongaiksuid ne ki nongleh sniew haduh kine ki sngi ka dang iai im ha ki jingmut jingpyrkhat jong kiba bun balang bad kane ka la jia mynta ka sngi ha ka shnong Umrit ha Ri Bhoi District ba ki 3 ngut ki nongshong shnong ki la shah pynjah burom da kaba shah pynkit tin halor ka jingkynnoh ba ki la don kti ban leh sniew ne ai ksuid ia kawei ka longïing hapoh katei ka shnong Umrit.
Kitei ki 3 ngut kiba la shah pynjah burom la tip kyrteng kum ka Kong Dilin Nongphlang, ka Kong Shidalin Nongphlang bad u Bah Hain Sohkhwai na ka Shnong Umkador.
Haba iakren bad u Rangbah Shnong Bah Epnas Thangkhiew, u la iathuh ba kane ka jingjia ka la sdang tang na ka kam tuh dieng ba la kynnoh ba katei ka Longïing jong ka Kong Dilin Nongphlang bad ka Kong Shidalin Nongphlang ki la leit tuh dieng na ka khlaw jong ka Kong Shuti Nongphlang.
U la ong ruh tang na katei ka kam, ka la mih ka jingiakynad hapdeng kitei ki longïing tad haduh ba la poi u pud ba ka Longïing jong ka Dilin Nongphlang bad Shidalin Nongphlang ki la phah leh sniew (Ai Ksuid) ia ka longïing jong ka Kong Shuti Nongphlang da kaba wan tep pylleng ba la kynnoh ban phah leh sniew ia u Bah Hain Sohkhwai naka Shnong Umkadhor.
U la bynrap ruh da kaba ong ba ki paidbah ryngkat ka bor shnong kila pyndeng tin ia kitei ki lai ngut hadien ka jingtohkit ka shnong kiba la phla shisha ba ki la leh sniew ia katei ka Longiing haba kubur ia ka jingtep pylleng.
U Bah Epnas Thangkhiew, u la pynpaw ruh da kaba ong, ba kane ka jingpyndeng tin ia kitei ki lai ngut kam dei satia ba ki shim ia ka aiñ ha ka ka kti bad kum ka jingpyneh rngiew bad pyneh daw ia ka shnong hadien ba ki la phla hi da lade ba ki la leh ia kitei ki kam sniew ban leh ksuid ia ka longïing jong ka Kong Shuti Nongphlang.
