Shillong, Nailar 03 : Ha ka jingjia ka bym ju jia koit, uwei u Khynnah klas 6 ha Meghalaya, ula shah “Pynshitom” ha ki bor pyniaid skul da kaba shah pynkieng juti ja-ing ha ryndang tang namar ba ym kren Phareng hapoh phyllaw ka skul.
Nalor kata, une u Khynnah ula shah pyniaid ha ryngkat ki juti ha ryndang hakhmat u Headmaster, ki Nonghikai ka Skul bad ki para Khynnah skul.
Hadien kane ka jingjia, ki Kmie Kpa kila leit ban ujor da ka ejhar sha ki Pulit bad kem ruh ba kane ka skul kala ai ka jingpyn shitom kaba palat liam ia u Khun jong ki, kaba ktah haduh katta katta bad kaba long be-ain.
Kane ka jingjia kala pynbitar lep wat ia kiwei ki Kmie Kpa bad ki nongshongshnong, kiba la dawa ba dei ban leh da kaba tyngeh ia ki bor pyniaid skul.
Haba kynthoh ia kane ka jingjia, u Myntri ka Tnad Pule Puthi Rakkam A Sangma ula pan kaiphod na u Deputy Commissioner jong ka District ba don kane ka skul lem bad na ka Tnad Pule Puthi.
U Rakkam ula niew ia kane ka jingjia kum ka bym iahap satia bad ong ba un sa shong bishar ia ka kam hadien ba ioh pdiang ia ka kaiphod na u Deputy Commissioner.
