Guwahati, Risaw 06: Ka kynhun kieng atiar kaba dang shu mih thymmai dang hapoh shi bnai mynta kala shah pynjem khnap noh ha ki bor pulit ka Assam ha kaba baroh ki dkhot jong kane ka kynhun kila shah kem noh.
Na ka liang ki pulit kila ithuh ia kane ka kynhun kieng atiar kaba dang shu mih thymmai kum ka Dimasa National Liberation Tigers (DNLT).La iathuh ruh ba ia kane ka kynhun la seng ha ka 13 tarik u bnai Nailur ba la dep.
Kane ka kynhun kala buh ia ki ktem jong ka hapoh Karbi Anglong bad Dima Hasao.
Ki khubor ki iathuh ruh ba kane ka kynhun ka dei kaba mih lyngba kiba bun tylli ki kynhun seng lehnoh kiba ia pait kiba don ia ki ktem ki jong ki hapoh Dima Hasao bad Karbi Anglong district.
Hadien ka jingshah kem noh jong baroh ki dkhot, na ka liang u Special Director General of Police, u GP Singh ula ong, “Ia kane ka kynhun kieng atiar DNLT ba la seng ha ka 13 tarik u Nailur ba ladep ha Dima Hasao bad Karbi Anglong district la lah ban pynjem khnap noh da ki bor pulit ka jylla lyngba ka jingioh kem noh ia baroh ki hynniew ngut ki nongialam lane ki dkhot nalor ka jingioh kurup ia ki tiar siat bad ki tiar pynbthei.”
Ula ong ruh ba ka jingpynlong ia ka jingtohkit halor kane ka dang iaid shakhmat.
