Guwahati, Risaw 05 :U Hemant Kumar Lohia, uba dei na ka jylla Assam bad uba bat kum u director general ka tnat phatok ha Jammu bad Kashmir ula shah pyniap noh ha la ka jong ka iingsah ha Udaywala hapoh Jammu ha ka 3 tarik mynta u bnai.
U Lohia 57 snem rta la suba jur ba ula shah pyniap noh hala u nong u nongtrei iing u Yasir Ahmed 23 snem rta.Ia u Ahmed la kem noh da ki pulit hynnin ka sngi ba Ar.
Ia u Lohia la lap ba ula shah siah na u ryndang ha ka 3 tarik mynta u bnai ha ka por kumba 11:45 pm.Nalor kata la shem ruh kila don ki thang ingding ha ki bynta jong ka met u Lohia.
“Ia ka metiap jong u DG Prisons ka J&K la lap ha ka rukom kaba i suba.Ka jingtohkit kaba nyngkong ha kane ka jaka bala jia la suba jur ba ka dei ka jingshah pyniap,” ong u additional DGP ka J&K u Mukesh Singh.
“Na ka liang ka tnat pulit ka J&K ka pynpaw ka jingsngewsih kaba khraw halor kane ka jingjia ia une u heh ophisar u jong ki,” ong u Mukesh Singh.
Ha kawei pat ka bynta, ka kynhun ka bym pat da pawkhmat kala shim ia ka jingkitkhlieh halor kane ka jingshah pyniap jong une u heh pulit ka J&K u Hemant Kumar Lohia.
Kane ka kynhun kala ong ba kane ka dei ka jingai sngewbha kaba rit na ka bynta u Myntri ka sorkar pdeng u Amit Shah, uba la sdang ia ka jingwan jngoh kaba lai sngi jong u sha kane ka thain naduh ka sngi Nyngkong ba la dep.
Kane ka kynhun ia kaba la tip kyrteng kum ka Peoples Anti-Fascist Front (PAFF) kala kam ba ka tnat ba kyrpang jong ka kynhun ka dei kaba donkti ha kaba iadei bad kane ka jingshah pyniap jong u Lohia.
“Kane ka dei ka jingai sngewbha kaba rit ia u Myntri kam pohiing, kata wat hapdeng ka jingpynjur ia ka jingpahara… ngin dang iai bteng ia kiba kum kine ki kam thombor..,” ong ka kynhun lyngba ka jingthoh bala pynphriang lyngba ki social media.
U Lohia u dei u ophisar Indian Police Service (IPS) na ka batch 1992.Ula shimti ia ka kam kum u DGP (Prisons) ha Jammu bad Kashmir ha u bnai Nailar mynta u snem.
Katkum ki khubor la ong ba u Lohia u dei u nongshong jong ka thain Athgaon ha ka nongbah Guwahati hapoh Assam.Nalor kata u dei ruh u khynnah pule barim jong ka Guwahati Commerce College ha Guwahati, Assam.
Ha kawei pat ka bynta na ka liang ka tnat pulit ka Assam ruh kala pynpaw ka jingsngewlem halor kane ka jingkhlad noh jong une u heh pulit uba dei na kane jylla.
Ia mynta hi la ong ba kam shym la don kano kano ka jingpyni dak halor ka jingdonkti jong ki kynhun lehnoh ha kaba iadei bad kane ka jingshah pyniap jong u Hemant Kumar Lohia.Ia kane la pyntip da u additional DGP ka J&K u Mukesh Singh mynta ka sngi Balang.
Nalor kata u Singh ula ong ruh ba ka jingtohkit ia utei uba la shah kynnoh donkti kala iaid shakhmat, bad la ong ba une u briew ula phla ruh halor ka jingdonkti ha kane ka kam pyniap.
