Nongpoh, Nailur 26: Ha kawei ka jingjia kaba ishyrkhei, kawei ka samla lud ba dang 19 snem ka rta, kala shah pyniap dusmon hynne shiteng sngi hala u jong u Baieid uba ka la iashong iasah lang ha kine ki san bnai bala leit noh.
Kane ka jingjia kala jia hynne ka sngi nyngkong ha ka Shnong Pahamsyiem, kaba hap hapoh ka Nongpoh Police Station. Ia ka metiap jong kane ka samla lud la lap na surok hadien ka jingshah pyniap ha une u briew.
Ka khubor Pulit ka iathuh ba une u briew bala 30 snem eiei ka rta, ula pyniap ia kane ka samla lud tang namar ka jingiania hapdeng jong ki.
Haba pyntip sha ki lad pathai khubor, u Superintendent of Police ka Ri-Bhoi District Giri Pradesh, ula ong ba ia kane ka jingjia la pyntip sha ki Pulit da ki Nongialam shnong ka Pahamsyiem. U iathuh ba ki Pulit ka Nongpoh Police Station tang mar ia ioh ia kane ka khubor, kila leit wut wut sha kane ka jaka ban pynlong ia ka jingtohkit.
“Une u briew ba pyniap ia kane ka samla ula phet krad tang mar syn dep pyniap hynrei da ka jingiarap jong ki bor Shnong, ki Pulit kila pynlong ia ka jingthwet bad kila ioh ban kem noh” ong u Prasad haba pyntip ba ia kane ka case la register ha Nongpoh Police Station bad ka jingtohkit mynta kala iaid shakhmat.
Une u Heh Pulit u iathuh ba ia ki jingtip ba bniah shaphang une u nongpyniap bad ia kane ka samla ym pat shym la ioh satia namar ka jingtohkit ka dang iaid shakhmat.
