Shillong Nohprah 16: Ka Meghalaya BJP Mahila Morcha hynne ka sngi Saitjaiñ kala pynrem jur ia ka jingleh khlem akor ia ka kynthei riewlum kaba la shah pyniaid lyngkhuid ha Belgavi, Karnataka.
Ka Kong Sukhi Pariat, State President ka Meghalaya BJP Mahila Morcha kala pynpaw ba ka seng ka pynrem jur ia katei ka jingleh ka bym iahap shuh pyrshah iaka thei riewlum.
“Kane ka jingshah thombor ia ka jinglong kynthei ka long pyrshah ha kane ka juk kaba la nang la shai bad ka long kaba sngewsih kthang ia baroh kiba don iaka rukom pyrkhat kaba dei. Ka sorkar jylla kadei ban shim ia ka jingkitkhlieh kaba la pynshlur ia kum kitei ki riewsniew bad ki riewkhlaw bad ki nongleh kam bymman bad dei ban pynshitom ia ki katkum ki aiñ ki kanun” ong ka Kong Sukhi ha ka kyrwoh khubor.
“Ngi ki kynthei jong ka BJP ngi shem ba ka long kaba eh ban pdiang ia kum kitei ki jingjia kiba mynta kila long ki da ki shin ha man la ki jylla kiba synshar da ka seng Congress. Ka seng ka jong ngi, ka dei kaba la pynlong ia ka kynthei riewlum kum ka President jong ka ri India bad la thung ruh da ka thei riewlum kum ka Chief Minister ha ki jylla kiba don ha ri thor. Ha kawei pat ka liang, ngi don ia ki seng saiñ pyrthei kum ka Congress kaba ka rukom pyrkhat ka jongki ka long ban pynthikna ba ki kynthei bad ki riewlum kim dei ban shngain hapoh ka jingsynshar ka jongki. Nga kyntu ia ki nongthep vote ba kidei ban ai jingsneng ia ka seng Congress ha ka elekshon Lok Sabha kaban sa wan. Kumba ong u Myntri Rangbah duh ka ri u Narendra Modi, ‘Congress Mukt Bharat, ka ri India kaba lait na ka seng Congress, kadei ban kylla long shisha noh” la pynkut ka Kong Pariat.
Halor katei ka jingjia ha Belgavi, Karnataka, ha kaba kawei ka thei riewlum kala shah pyniaid lyngkhuid, na ka liang u National President ka BJP u Jagat Prakash Nadda ula pynrem jur halor katei ka jingjia kaba shyrkhei bad ula thung ruh iaka Fact Finding Committee kaban don 5 ngut ki dkhot ba kin leit ban jngoh ia katei ka jaka bad kane ka committee kan sa aiti mardor ia ka kaiphod u National President.
