Guwahati, Nohprah 19 :Kawei ka longkmie kala shah lute noh ki ksiar ki ksah ha ka kynhun ki runar ki bym lah ban ithuh hadien ba ka la shah pynap da ka suloi hynne ka sngi ha ki bynta jong ka Satgaon, Assam.
Katkum ki tyllong khubor, ki runar kiba la wan da ki artylli ki thuk thuk kila apktem lypa ia katei ka longkmie bad lute ia ki ksiar ki ksah hadien ba kila pynap da ka suloi, kata ha ka por ba kane ka longkmie ka dang don ha ka lynti ban leitphai sha la iing hadien ba kala wan na ka jaka iew kaba marjan.
Kham hashwa, kata ha ka 16 tarik mynta u bnai, ki bor pulit ka sorbah Guwahati hapoh ka jingialam jong u ADCP Central u Kalyan K Pathak kila ioh ban kem noh ia u runar ba shyrkhei uba ba tip kyrteng kum u Rafiqul Islam bad ia uba la khot u Gol Kata Babu ka Jania, napoh Rajgarh, Barpeta.Na une u runar ki pulit kila ioh ban kurup noh ia kawei ka pistol ha ryngkat ki kuli.
Ha kawei pat ka liang, ki bor pulit ka sorbah ha ka jingiakhun pyrshah ia ki kam pyntriem kila rah noh ia laingut ki briew na ki bynta jong ka Birubari, bad hadien ka jingtohkit la shem ba ha ki bynta bapher bapher jong ka sorbah Guwahati kaba kynthup ha Paltan Bazar kila don shibun ki kam lute ha kaba ia ki tiar ba la ioh lute la ju die noh ha ki bynta jong ka Rangiya kaba hapoh Puthimari.
Ha kawei pat ka bynta hadien ka jingjia shah pyniap jong u manager ka Purabi dairy u Ranjit Bora uba la shah siat iap ha ka por mynsngi mynshai ha Panjabari hapoh Guwahati, na ka liang ki bor pulit ka Guwahati kila ioh ban kurup noh ia kawei ka pistol ia kaba la suba ba la pyndonkam ha kane ka kam pyniap.
Ki bor pulit kila lapdien ia kawei ka pistol 9 mm ha ryngkat laitylli ki kuli na kawei ka thuk thuk kaba dei jong utei u suba.Ia kane ka thuk thuk la ioh kurup na kawei ka karkhana ka bym shym la pyndonkam shuh.
