Nongpoh, Rymphang 21 : Ki Pulit ka Ri-Bhoi District, kila khot hajir ia ki trai jong ka YouTube Channel “7Trep TV” halor ka ejahar bala mudui da u Chairman ka Synjuk ki Rangbah Shnong ka Ri-Bhoi, namar ka jingpynmih ia ka khubor thaw hi kaba pynjah burom bad bet ia u synbai iashun hapdeng une u Rangbah bad u CEM ka KHADC Bah Pyniaid Sing Syiem.
Tang hadien lai kynta ba ioh pdiang ia ka ejahar, ki Pulit ka Ri-Bhoi kila lap ia ki trai jong kane ka YouTube Channel bad kumjuh ruh ia u briew uba kren ha ka Channel tang da ka sur (voice over), ban pynman ia u Chairman ka Synjuk ki Rangbah Shnong Bah BB Makdoh.
Kine ki briew ki kyrteng u Fernando Diengdoh uba dei u trai ka Channel bad uba shong bas ah ha Kynshi, Eastern West Khasi Hills lem bad u Neverson Marbiang uba ai jingkren tang da ka sur (voice over) ia ka khubor, uba shong ba sah ha ka shnong Erpakon, Ri-Bhoi
District.
Ki Pulit ka Nongpoh Police Station kila rah ia kine ki arngut sha Thanad ban pynlong ia ka jingtohkit bad hadien kila pyllait noh ia ki bad phah wan ialam ia ki Kmie Kpa lashai ka sngi ban iakren ia kane ka kam.
U Bah BB Makdoh ula ai khublei ia ki Pulit ka Nongpoh kiba la shimkhia ba tang hapoh 3 kynta kila lap ia kine ki arngut kiba donkti ban pynthohbria ia ka kyrteng jong u da kaba pynsaphriang ia ki khubor thaw hi bad khubor lamler.
Ula ong ba kum u Nongialam jong ki Rangbah Shnong, ym don satia ia kano kano ka daw bad kitei ki arngut ki samla haba pynpaw ruh ia ka jinglong ba kloi ban map ia ki lada ki kylla kaba mut noh.
Ha kajuh ka por, ula maham ruh ia kine ki arngut ki samla bad ia kiwei kiwei ki nongpynmih ia ki YouTube Channel ba kim dei ban thaw hi ia ki khubor ne pynmih ia ki khubor thok khubor lamler kaba lah ban ktah ia ka longrynieng jong u briew bad ialam bakla ia u paidbah.
