Shillong, Naiwieng 07 : Ki Nongialam ka seng Hynniewtrep Youth Council (HYC) hynne ka sngi nyngkong, kila shah khot hajir ha ka Sadar Police Station halor ka jingiatur paidbah ba kynsan kynsan ha Secretariat ha u snem 2021 ban dawa pyntreikam ia ka Inner Line Permit (ILP).
Ki Nongialam ka HYC ba kynthup ia u vice president Donboklang Kharlyngdoh, Assistant General Secretary Isaac Basaiawmoit bad Shillong City president John Lyngdoh kila leit mih hakhmat u investigating officer (IO) ka Sadar PS haba iadei bad ka case bala register pyrshah ia ki hapoh ka Thanad.
Haba iakren bad ki Nongthoh khubor, u Bah Donbokang ula ong ba ka notice khot hajir kaba la ai sha ki lai ngut ki Nongialam ka dei halor ka jingjia bajia ha u snem 2021 haba ka HYC bad kiwei ki kynhun hapoh ka lama jong ka Confederation of Meghalaya Social Organization (CoMSO) kila pynlong ia ka jingiatur paidbah sha Secretariat ba iadei bad ka jingdawa pyntreikam ia ka ILP.
“KI Pulit kila pyntip sha ngi ba ngi la shah pynngat ha ki case jong u snem 2021 ba ngi tur paidbah sha Secretariat nalor ka jingkylli ia kiba bun ki jingjia halor kane ka jingiatur paidbah. Ka jubab jong nga ka long ba lada ngim leit ban pynsngew ia ka sur jingdawa jong ngi halor ki kam ba kongsan hakhmat ka Secrertriat, shano pat ba ngi dei ban leit” ula ong.
Ula ong “ Phi dei ban kynmaw ba ki sengbhaang kila hap ban iakhin hajan ka Secretariat namar ka jingiohi ba kam don satia ka jingshimkhia jong ka Sorkar wat hadien bala dep mynjur ia ka Resolution ha u snem 2019”.
Haba pynpaw ba ka HYC kam hun satia ban iohi ba ka jingdawa ILP kan shu kut tang ha ka jingmynjur ia ka Resolution, u Bah Donbok ula ong “Ka Manipur kala ioh ILP bad ngi ruh ngi kwah ban ioh ia kajuh ka jingiada bad namar kata ngi la tur sha Secretariat ban pynkynmaw ia ka Sorkar MDA b aka Meghalaya ruh ka dei ban ioh ia ka ILP”
Haba kylli, une u Nongialam ka HYC ula ong ba ki sengbhalang kin nang pynkhlain ia ki jingiakhin jong ki ban pynthikna ba ka ILP kan treikam hapoh ka Jylla.
“ Kum u Nongialam ngam sngew pher ban shah kem ne leit shong along katba ka Jaidbynriew kan im bad kan ioh ia ki jingiada kaba donkan. Ngim sheptieng satia bad kane ka dei ka khubor kaba ngi phah sha ki dkhot jong ngi bad kiwei ki Sengbhalang namar kam dei ka pop ban dawa ia ka ILP” ula ong.
Ula ong ba ki 60 ngut ki MLA kila leh ia ka kam pop da ka jingbym lah ban buddien ia ka resolution halor ka ILP.
Ha kajuh ka por, u bah Donbok ula kyntu ia ki paidbah ka Jylla ban ai ka jingkyrshan ba pura ia ka jingdawa ha ka ban pyntreikam noh ia ki ain ki ban ai jingiada ia kii paidriewlum bad ka khyndew ka shyiap ka jong ki.
