Byrngem ban leit ujor sha ki bor ba halor kynthup ka Iingkashari
Shillong, Nohprah 19 : Ka Jaintia National Council- Central Executive Committee (CEC) kala kam ba kala shah khang lynti ban leit iashimbynta ha ka Public Hearing jong ka Meghalaya State Pollution Control Board (MSPCB) ban seng karkhana dewbilat ka kompani Shree Cement Ltd ha Daistong, East Jaintia Hills.
Kane ka Seng ka kynnoh ba ki riewtap khmat kiba rah bad ki tiar pynmynsaw, kila khang lynti ia ki dkhot ka seng bad kumjuh ruh ia ki nongialam shnong ka Daistong ha ka surok ban leit sha ka jaka ba pynlong ia ka Public Hearing.
U President ka JNC Bah Sambormi Lyngdoh ula kynnoh ba kine ki riewtapkhmat ki dei kiba la bei tyngka da ka Shree Cement Ltd bad kiba la sma kyiad puk puk.
La kynnoh ba kine ki briew kila khang lynti ruh da ki dumper truck ia ka surok haduh ba ki nongshongshnong kim ioh lad suh ban poi sha kane ka jaka. La kam ba wat u Deputy Commissioner ka East Jaintia Hills, ula hap ieh ia ka kali ha kane ka jaka bad hap iaid da ka kjat.
“U Deputy Commissioner, la iohi ba ula ieh ia ka kali bad iaid da ka kjat namar kane ka jingkhang lynti, ia kaba ula pynpaw kum ka “jingleh ka bym iahap ba wat ki bor District la i kumba kim don bor ban iatynjuh bad kine ki briew” ula ong haba iathuh ba ki Nongialam ka JNC kila pyrshang ban iakren bad u DC hynrei ula kyntait.
Une u Nongialam ka JNC u kynthoh “Ha ka jaka ba ki Pulit kin ai jingiada ia ki nongshongshnong ba jai jai, ngi la iohi pynban ia ki spah ngut ki riewtapkhmat kiba pyniaid ia ka surok, kaba pynmih ia u dak jingkylli halor ka jingpyniaid ia ka suk ka sain”.
U Bah Sambormi ula kam ruh ba ki nongshongshnong ka Daistong kiba shah ktah ha kane ka jingthmu seng karkhana, kila shahktah kti ruh ha kine ki riewtapkhmat haba ki pyrshang ban leit shaka hearing.
“Ka HNLC kala pynkhreh ia ka jingpyrshah da ka jingthoh kaba batai bniah ia ki jingpynkhein ia ka Environment Impact Assessment (EIA) Notification, 2006, hynrei bun ki nongpyrshah kim shym lalah ban poi sha kane ka jaka ba don ka hearing lane ban pule ia ki mat jong ki” ula kynthoh.
Ula kynthoh ba ia kane ka public hearing halor ka jingseng karkhana ha Daistong la pynlong hapdeng ka jingtieng jingsyier bad jingpynthut, kaba khang ia bun ki nongshongshnong ba shah ktah ba kin iashimbynta.
U Bah Sambormi u pyntip ba ka JNC kaap mynta ba kan leit aiti ia ka jingujor da ka jingthoh lem bad ki kot ki sla sha u Deputy Commissioner lem bad kiwei kiwei ki bor.
Ula pynbna baka Council kan sa buddien ia kane ka kam bad ki bor kiba halor bad ka Iingkashari. “Ngin ym shongkli kti. Ngi rah ia kane ka kam sha ka Iingkashari khnang ba kum kine ki Public Hearing, ba pynlong hapdeng ka jingpyntieng pynsmiej bad lehdonbor, yn ym lah ban pynksan ia ka jingioh environmental clearance na ka bynta ka project” ula ong.
 kala kam ba kala shah khang lynti ban leit iashimbynta ha ka Public Hearing jong ka Meghalaya State Pollution Control Board (MSPCB) ban seng karkhana dewbilat ka kompani Shree Cement Ltd ha Daistong, East Jaintia Hills.){kind=link}