Aizawl, Nohprah 06 :Ha kawei na ki jingioh kurup drok kaba jop, ki dkhot na ka tnat Aizawl Battalion jong ka tnat shipai 23 Sector Assam Rifles ha ryngkat ki dkhot ka tnat Excise bad Narcotics Department kila ioh ban kurup ia 18 tylli ki synduk sabon kiba don ia u drok heroin uba 236 gram uba shongdor haduh kumba T.1.18 klur na Aizawl.
Ia une u drok la ioh ban kurup hynnin ka sngi Nyngkong hadien ka jingioh jingtip kaba thikna halor ka jingdon jong ki suba nongkhaii drok kiba thmu ban shalan beain ia une u drok ha ki bynta jong ka Falkland ha ka lynti surok World Bank Road ha Aizawl.
Na ka liang ki bor pahara kila ioh ruh ban kurup noh ia ki kali ba la pyndonkam ha kaba khaii drok beain.Ha kane ka jingjia sawngut ki briew kila shah kem noh.Na ka liang ki pulit kila rejistar case pyrshah ia kine ki briew bad ka jingtohkit ka dang iai bteng.
Kham hashwa, kata ha ka 11 tarik u Naiwieng 2022, ka tnat Criminal Investigation Department (CID) na ka tnat pulit ka Mizoram kila ioh ban kurup shibun bah u drok Methamphetamine uba shongdor haduh kumba T. 58 klur bad kem noh ia arngut ki briew kiba donkti na ka nongbah Aizawl.
Hadien ka jingioh jingtip na ka tnat syntiat, ka kynhun na ka tnat CID (SB) kila ioh ban kurup haduh ar lak tyli ki dawai kuli Methamphetamine kiba don ia ka jingkhia kaba haduh 19.223 kilo na ka kali ha ki bynta jong ka Luangmual ha Aizawl, ong ka khubor heh sorkar.
