Itanagar, Risaw 05 : Sa laingut ki briew kila shah kem ha ki bor pulit ha kaba iadei bad ka jingjia lait tuh ki jingkylli na ka bynta ka eksam ba la pynlong da ka Arunachal Pradesh Public Service Commission (APPSC) ha Arunachal Pradesh.
Ka jingshah kem biang jong kine ki laingut halor kane ka jinglait tuh ki jingkylli jong ka APPSC eksam kala kyntiew ia ka jingdon jong baroh kiba la shah kem halor kane ka jingjia sha ka khyndai ngut.Napdeng kine ki laingut kiba dang shu shah kem shen arngut na ki, ki dei ki heh sorkar.
Ia kine ki laingut kiba la shah kem arngut na ki, kiba dei ki heh sorkar ki dei kiba la tip kyrteng kum u Binam Jomang bad u Talung Jomang nalor u Loth Ezing uba dei u riew paidbah.
Katba u Binam u dei uba trei kum u junior engineer (contractual) hapoh ka tnat Panchayati Raj ha Lekang kaba hapoh Namsai district ka Arunachal Pradesh, u Talung u dei u field assistant ka tnat agriculture ha Pangin kaba hapoh Siang district.Katba u Ezing u dei u nongshong shnong napoh Ruksin ha East Siang district ka Arunachal Pradesh.
Kane ka jingioh kem kala wan long ruh hadien ba la aiti ia kane ka case sha ka kynhun tohkit ba kyrpang special investigation cell (SIC) jong ka tnat pulit ka Arunachal, kata na ka tnat pulit ka Itanagar naduh ka 27 tarik u bnai Nailur ba ladep.
Kham hashwa ki bor pulit ka Itanagar kila kem noh ia hynriew ngut ki briew ha kaba iadei bad kane ka jinglaittuh ki jingkylli.Kito kiba la shah kem kat haduh mynta ki kynthup ia u deputy secretary bad u deputy controller of examinations ka APPSC u Taket Jerang.
Ka jylla Arunachal Pradesh dang shen kala ngat ha ka jingkhihwin namar ka jinglaittuh ki jingkylli eksam na ka bynta ka jingpynrung sha ka kam assistant engineers (civil).Ia kane eksam la pyniaid da ka Arunachal Pradesh Public Service Commission (APPSC).
Na ka liang ka APPSC kala ong ba kan pynlong da kawei pat ka eksam na ka bynta ka post assistant engineer (civil) bad ia ka tark na ka bynta kane yn sa pynbna shen.
