Guwahati, Risaw 19 :Kumba arngut ki briew kila shah kem noh ha Assam halor ka jingshah kynnoh donkti bad ka kynhun seng lehnoh Al Qaeda.
Baroh kine ki arngut ki briew bala shah kem kila shah kynnoh donkti bad ka kynhun seng lehnoh Ansarullah Bangla Team (ABT), kaba la ioh ia ka jingkyrshan da ka Al-Qaeda in the Subcontinent (AQIS).
Ka jingshah kem jong kine ki arngut kala wan long ruh tang shi sngi hadien ba sawngut kiwei pat kila shah kem noh na Assam halor ki juh ki jingkynnoh.
Ka jingioh kem ia kine ki arngut kala wan long ruh hadien ka jingai jingtip da kitei ki sawngut ki suba kiba la shah kem noh kham hashwa.
Ia kitei ki suba lehnoh la ioh ban kem na Barpeta, Tamulpur bad Nalbari district ka Assam.
Naduh kaba sdang jong ka jingkhynra pyrshah ia ki jingtreikam jong ki kynhun lehnoh hapoh Assam naduh u bnai Iaiong ba la dep, ki pulit ka Assam kila ioh ban kem haduh 45 ngut ki briew na ki bynta bapher bapher ka jylla.
Kiba bun napdeng kiba shah kem ki dei ki nongialam niam hapoh ki mosque lane ki nonghikai jong ki skul madrassa kiba shimet hapoh Assam.
