Goalpara, Nailar 11 : Ki kyrbei watla kila shah kynthup ha ka thup ki mrad ba don ha ka Schedule 1, hynrei ki dang don hi ki briew kiba leh beh bad pyniap ia kine ki mrad ban ioh khaii ia ki snieh.
Ka snieh kyrbei ka dei ka snieh kaba jur bha ka jingkhaii ha ka pyrthei bad ki dei kiba don jingma bha ban duh jait namar ka jingshah beh bad shah pyniap.
Ka thain shatei lammihngi ka dei ka lynti khaii kaba pawnam ha kaba khaii ia ki snieh kyrbei bad kiwei kiwei ki mrad khlaw kiba la khein beain ban pyniap, na India sha China.
Ka tnad khlaw ka Assam ka la kem ia ka kynhun ki nongbeh mrad ha Daranggiri, Goalpara District hynne ka sngi u Blei ryngkat ki snieh kyrbei.
Ki bor Sorkar ki la kem ia saw ngut ki briew ha kawei ka jaka bam harud surok ha Daranggiri, katba ki dang pyrshang ban die ia ki snieh ha ka dor kaba 20 hajar tyngka. Ka kynhun na ka Tnad Forest ka Rangjuli ka la kem mar mar ia kine ki runar bad kurup ruh ia ki snieh.
U Dharmendra Das, na Rangjuli Forest, u la iathuh ba kitei ki snieh ki khia kumba shi kilo bad kidei kiba shongdor kumba T.1.5 lak tyngka.
Kine ki briew ba shah kem ki kyrteng u Jindas Momin, u Benarson Momin, u Kilen Sangma, bad u Cabisto Momin bad baroh ki na ka thain Kharkutta jong ka jylla Meghalaya. Na ka liang jong ka tnad khlaw ka la register case pyrshah ia kitei ki nongkhaii tuh bad ka la sdang ruh ia ka jingtohkit kaba kham bniah.
