SHILLONG, Rymphang 09: Haduh 31 ngut ki briew kila shah kem halor ka jingshah kynnoh thaw jingkulmar ka ba la mih hapeng ki nongkyrshan ka All India Trinamool Congress (AITC) bad ka National People’s Party (NPP), haka miet 7 tarik mynta u bnai hapoh ka shnong Charbatapara ka ba hap ha Phulbari Constituency.
Naka liang ka ophis District Election Officer ka pyntip ba ka jingkulmar kala mih hadien ba ki nongkyrshan ka AITC kila tynrah iaka kali Scorpio jong u MDC ka NPP u Habibur Zaman u bala iaid lyngba ka shnong Charbatapara ka ba hap ha West Garo Hills.
U Chief Electoral Officer (CEO) u bag F.R Kharkongor ula iathuh ba la ioh jingtip na ka ophis District Election Officer of West Garo Hills ba ka kali jong u MDC ka NPP kala shah tynrah haka kali ki nongkyrshan ka AITC bad dei na kane ka daw sa mih jingkulmar.
Haba iadei bad kane ki Pulit ka West Garo Hills kila phah soi soskular (bond) haduh 125 ngut ki briew kiba la ju shah kynnoh donkti ha ka ban thaw jingkulmar bad ia kine baroh la rah sha ing kashari naka bynta ban phah soi iaka soskular.
Kum shi bynta ban peitngor iaka shong suk shong man, naka liang ki bor pulit bad ki bor district kila pynlong daka Flag March hapoh ka shnong Charbatapara, Haribhanga bad ha kiwei ki shnong marjan ban pyni iaka jingkhlain ka bor jong ka ain.
Ki bor district kila pynlong ruh ka jingai jingpynsngewthuh iaki paidbah halor ka jingdonkam ban wanrah ia ka shong suk shong shngain naka bynta ban pyniaid beit iaka ilekshon ka ban long haka 27 tarik mynta u bnai.
