Imphal, K’lyngkot 17: San ngut ki pulit ka Manipur ki la shah kem noh ha ka sngi Nyngkong katba ki dang pynpoi ia shibun bah u drok kaba kynthup ia u heroin bad ki dawai kuli Methamphetamine tablet na ka sor rit Moreh ha khappud ka India-Myanmar.
Na ka liang u Superintendent of Police (SP) ka Kakching districtu Shrey Vats u la ong ba kine ki san ngut ki pulit ki kynthup ruh ia uwei u pulit langrut kiba la shah kem noh katba ki dang shimti ia u drok uba la wan poi beain napoh Myanmar da ka jingthmu ban pynpoi sha ka nongbah Imphal lyngba ka kali Maruti Gypsy.
Utei u heh pulit u la ong ba ha ka por ka jingpynlong ia ka jingkhynra kali ha ki bynta jong ka Kuraopokpi ha ka surokNational Highway 102 ki bor pulit kila ioh ban kurup noh ia une u drok bad kem noh ia kine ki pulit kiba donkti.
Ia kine ki pulit kiba la shah kem noh la tip kyrteng kum u Havildar Kh Achouba Singh, Constable Y Dineshwor Singh, u Riflemen Th Subhash Chothe, u M Premchandra Singh bad u N Dorendrajit Singh.
Nalor kata utei u heh pulit u la ong ba kila ioh ban kurup kumba 1.33 kilo u drok heroin bad haduh kumba 80,000 tylli ki dawai kuli Methamphetamine tablets (ia kiba ju khot ruh ki Yaba tablet ne party tablet) kiba don haduh 9.151 kilo bad kiba shongdor da ki klur tyngka.Ki pulit ki la ioh ruh ban kurup noh ia ka pisa T.80,000 na uwei na kine ki pulit kiba la shah kem noh.
Hadien kane la aiti noh ia kine ki briew kiba la shah kem shapoh akching Police na ka bynta ban bteng shuh shuh ia ka jingtohkit.
Ka sorkar Manipur hapoh ka jingialam u Myntri Rangbah (CM) ka jylla u N. Biren Singh kala iaid shakhmat ha ka jingiakhun pyrshah drok ha ka jylla. “Ka thma drok kam dei na ka bynta ki jingioh nong shimet jong nga.Ym shym la don uwei ruh na ka longiing jong nga ki ban ngat ha u drok.Ka pateng ka ban wan kan shah sar naphang lymda ngi iasnohkti lang ban iakhun pyrshah ia ka jingshyrkhei jong u drok,” ong u CM ka jylla lyngba ki lad pathai khubor.
Ha kawei pat ka jinglong jingman, na ka liang ka sorkar Manipur naduh ka sngi Nyngkong kala sdang ban pynkhreh da ki drone na ka bynta ban pynjulor ia ki jaka rep poppy. Ia kiba kum kine ki jingpynjulor yn pyntreikam ha baroh kito ki jaka kiba rep ia une u jingthung ba ju pyndonkam ha kaba shna drok, ong u CM lyngba ka twitter.
