Shillong, Nailur 18: Ki pulit jongka East Khasi Hills kila iohkem ia 4 ngut ki nongdawa pisa kiba la dawa T.10 Lak na uwei u briew.
Katkum ka kyrwoh na u SP ka East Khasi Hills u Bah S Nongtnger ula iathuh ba ha ka 24 tarik u Nailar 2024 kala don ka jingujor ejahar ha Madanrting Police Station ba ha ka 8 tarik u Nailar 2024, uwei u briew u bym lah ban ithuh ula phone ia uba ujor ejahar ha kanpor 7 baje mynmiet ha kaba ula dawa T.10 Lak.
Hadien katei, utei u briew ula phone biang la bunsien bad dawa ba dei ban siew noh mardor ia katei ka pisa.
Hynrei u nongujor ym shim la kohnguh ia katei ka jingdawa, kumta utei u nongphone bad arngut kiwei pat kila leit rung jubor sha ka iing jong utei u nongujor ha ka 20 tarik u Nailur ha ka por kumba 7 baje mynmiet da ka jingthmu ban dawa pisa.
Namar ba u nongujor ym shim la don ha iing ha katei ka por, kumta kitei ki briew kila byrngem byrsit ia ka khun kynthei ka jong u ban leh da kaba tyngeh.
U SP ula pynpaw ba la rejistar case ia katei ka jingjia ha Madanrting Police Station bad ha ka jingtohkit la iohkem ia ki 4 ngut kiba kynthupnl ia u Garnett Gedian Khongwir, 30 snem ka rta bad u Kyrshanbor Lyngdoh, 38 snem kiba dei ki dkhot ka HNYM. U Thounaujam David Singh, 41 snem ka rta bad u Narendra Kabrambam, 29 snem ka rta.
Ka jingtohkit halor katei ka jingjia ka dang iaid shakhmat ban wad ia ki daw tynrai baroh, la pynpaw u SP.
