Guwahati, Nohprah 18: Ki pulit ka Assam bad ki Shipai jong ka Assam Rifles kila ioh kem ia ki 3 ngut ki ehrang jong ka Naga National Council (NNC) na ka shnong Kroulong bad Namdailong kaba don ha khappud jong ka jylla Assam bad Manipur.
Kine ki 3 ngut kiba la shah kem ki kynthup ia u Pouning Rongmai, u Ditiuoayang Rongmai bad u Namiaorei Gangmei.
Ki pulit ka Cachar haba kila ioh ia ki jingtip kiba thikna, kila iatreilang bad ki shipai jongka Assam Rifles ha kaba kila pynlong ia ka jingkhynra bad kila iohkem ia kitei ki ehrang ka NNC.
Haba iakren bad ki nongthoh khubor, u SP ka Cachar u Numal Mahatta ula ong, ba kitei ki lehnoh kidei kiba la don rekod ha ka jingdonkti haki kam dawa pisa bad kidei kiba la suba jur ruh ba kila donkti ha kaban pyniap ia ki nongialam kiba la mih noh na ka seng NNC, ia kaba ia ka metiap jongki la lap na ka shnong Namdailong ha ka 12 tarik u Nohprah.
“Ha ka jingtohkit, kitei ki ehrang kila phla ba kidei ki dkhot kiba pura bad ki Area Commander ha ka thaiñ Zeliangrong jongka Naga National Council,” ong u SP.
Ula ong ba la kem ia kitei ki lehnoh ha kaba iadei bad ka jingjia ha Jirighat Police Station kaba dei ka Case No 36/23 U/S 302 IPC R/W 27 Arms Act.
“Hadien ka jingtohkit bniah, la kem noh ia ki bad la aibor ia ki pulit ban pynlong 10 sngi ka jingtohkit ia ki” ong u SP.
Ula iathuh ba ka jingtohkit ka dang iaid shakhmat bad kin dang don shuh shuh kiban sa shah kem.
